Daini na Ja Chyum Mungga hpe hti sumru yu ai shaloi e, Hprishe ni hte laika ka ai sara ni mara lu ma ai lam Yesu tsun ai hpe na chye lu ga ai. Anhte masha ni gaw tinang a myit kraw kata hpe chye na matu shakut ai hta, tinang gaw kaning re ai wa re ngu ai hpe madun dan na matu grau nna, myit sharawng nga ai. Mying dan hkung mayu ga ai. Tinang a myit kraw kata tsawm htap na hta, ntsa lam mu mada ai shinggan tsawm na matu shakya chye ma ai. Tara rap ra na hte, Karai Kasang hpe tsawra na hta, reng power ni hta sha myit marin nga ma ai.

Madu Yesu gaw, Hparishe ni hpe lup wa hte bung ai nga nna, aja awa tsun jahpyak da nga ai. Lup wa gaw ntsa hku yu yang grai hpraw tsawm nna, kata de gaw matsat shabat rai nga ai hpe anhte yawng chye da sai hkrai rai nga ai. Dai zawn sha myit kraw kata e gaw, namak lawhpa myit marin ai. N ju n dawng myit masin pawt rai dum ai. Bai shinggan e gaw, dingman masu nga ma ai. Madu Karai a tsawra myit hte bung pre ai myit kata hta e, ngang kang ai galai shai ai lam ra nga ga ai. Shingrai kata lam hte shinggan maga lahkawng hpe galai ya lu ai Madu Karai hta e, anhte a myit masin hte hkum hkrang hpe ningnan sing bai gram la nna, galai la nga ga.