Daini na Ja Chyum Mungga hpe hti sumru yu ai shaloi e, Hprishe ni a matsi hpe sadi mu. Bai zingri zingrat hkrum yang hkrit tsang myit n nga u ga ngu ai lam ni na la ga ai. Madu Karai gaw anhte langai hpra a myit kraw kata shinggan yawng hte mu mada ya ai. Shi a shawng e hpa mi raitim makoi magap da n lu ai. Anhte ni gaw, masha ni tsun jahpoi na hpe hkrit tsang ai majaw, kaga masha ni mu mada lu ai hkum hkrang shingyan ni hpe chyu sha myit maju jung galaw sa chye ga ai. Kaga masha ni n mu lu ai kraw kata e n ding man ai myit, n ju n dawng ai myit, tengman lam n nga ai lam, tsawra myit ni grai nan hkrat sum nga ai.

Ndai zawn n kaja ai lam ni hte hpring tup nga ai masin salum hpe galai gram la na gaw malap nga ma ai. Ya daini na kabu gara shiga hta, anhte hpe Hparishe ni zawn, kaja masu ai, hpyi hpun ai lam ni koi yen nna, hkum hkrang hpe chyu sha sat ai wa hpe n hkrit ai sha, Wenyi hte hkum hkrang lahkawng yan hpe sat chye ai wa hpe sha hkrit ra nga ai. Anhte a hkrit tsang hpa lam ni hpe Karai Kasang a lata kaw ap ya let, Madu Karai a makawp maga ya ai a ntsa e, ngang kang ai kam sham myit hte sit sa nga ga law.