Wa Sarabyin Leo XIV gaw, San Petru shawa shara hta zuphpawng nga ai nawku hpung masha ni hte rau, Laban shani na Angelus mungga hta Kabu Gara Shiga hta, hkawhkam langai mi shi a kasha a matu lajang da ai hkungran poi a ga shadawn hpe myit sumru yu let tsun shadum n-gun jaw lai wa ai.
Shi a mungga hta, “kaja ai lam gaw, shi a shingra tara hku nna, chyam bra wa chye ai ngu ai San Thomas Aquinas tsun ai hpe bai myit dum shangun ai.
Ga shadawn hta lawm ai hkawhkam wa zawn, anhte mung anhte a kabu gara lam hpe kaga masha ni hpe garan gachyan na matu ra sharawng ga ai.
Raitim, Yesu a ga shadawn gaw hkawhkam wa a kabu gara ai lam hpe hkap tau la ai lam n nga ai hpe madi madun nga ai.
“Nkau mi gaw pawt sindawng ai, hkawhkam wa a dat kasa ni hpe jahpoi asawng ai hte sat pyi sat kau ai” nga nna shi tsun ai. “Kaja wa myit n pyaw hpa gaw, anhte hta mung ndai zawn byin wa chye ai, hpa majaw nga yang, anhte galaw na matu jaw ai kaja ai lam hpe galoi mung chye na ya ai, masat masa galaw ya ai, manu shadan ya ai lam n nga ai.”
Raitim, ningdang kau hkrum ai shaloi myit n daw ai sha, anhte a masing ni hpe matut galaw sa wa nna, hkawhkam wa zawn, kaga ni hpe mung anhte a kabu gara lam hpe garan gachyan na matu saw shaga ra ai, nga nna shi matut tsun ai.
Dai hpang Wa Sarabyin Leo gaw, ndai ga shadawn hta lawm ai madung ni gaw kadai ni hpe malai tsun ai ngu ai ga san hpe sawk sagawn yu ra ai lam hpe tsun shadum ai.
Tsaban 5 prat na chyum hpaji ninghkring kaba San Pra ai Jerome gaw, hkawhkam wa hpe Sumsing Kawa hte, la nnan hpe Yesu, num nnan hpe Nawku hpung ngu nna masat da ai.
Wa Sarabyin tsun ai hta, anhte mung ndai ga shadawn hta lawm nga ga ai, anhte gaw Nawku hpung hta lawm ai ni rai nna, anhte a prat hpe Shi hte rau, Shi a prat hpe kaga masha ni hpe garan gachyan na matu Madu lata la hkrum ai ni rai ga ai.
“Hkungran poi gaw anhte a matu rai nna, poi gawk gaw anhte a nawku htingnu ni hte nta ni rai nga ai, anhte nga ai shara ni hte Hkawhkam wa a Kasha Yesu Hkristu gaw anhte hpe tsawra ai lam matut tsun dan nna anhte a ‘rai sa, yes’ ngu ai ga hpe la nga ai shara ni rai nga ai” nga nna tsun ai.
Bai nna, Wa Sarabyin gaw, Hkristan kabu gara lam gaw, shinggyim masha ni galaw shapraw ai n re ai sha, “sung htum ai, tengman ai, ngang kang ai” ngu ai hpe madi madun da nga ai.
Anhte a kabu gara lam gaw, “anhte hkrum zup ai masha ni a myi man zawn tsawm htap nga ai. Anhte a shani shagu na nhtoi ni hpe hpring tsup shangun ai bungli, mani sumsai, myi prwi, lata shakram ai, matsan dum lama ai lam ni zawn tengman nga ai. Mungkan hpe hkye hkrang la na matu Karai Kasang a kumhpa re” nga nna tsun ai.
