Matsan mayan lam hte n rap ra ai lam hpe shabyin ya ai mara a hkrang masa ni
90. Medellín mare hta, Saradaw ni gaw matsan mayan ni a matu grau ra sharawng ai lam hpe madi shadaw ai lam tsun shapraw ma ai: “Anhte a Hkyela Madu Hkristu gaw matsan mayan ni hpe tsawra ai sha n-ga, ‘sut su ai ni a majaw matsan mayan tai wa ai.’ Shi gaw matsan mayan hkrum ai prat hpe hkam sharang let, matsan mayan hkrum ai ni hpe hkaw tsun na matu shi a sasana magam hpe madung tawn nna, ndai anhte a Nawku Hpung hpe hpaw ninghtan wa ai. anhte a hpunau nauna law law hku nna tara rap ra lam, kahkyin gumdin lam, sakse hkam ai lam, ap nawng ai lam hte dai hpe jahtum kau na matu shakut shaja ai lam ni hpe hpyi shawn nga ai, dai hku nna Hkristu ap ya ai hkye hkrang la ai sasana magam bungli hpe tup hkrak shadik shatup lu na re.” Saradaw ni gaw, Nawku hpung hpe, shi a shaga la ai lam hpe tsep kawp sadi dung lu na matu, matsan mayan ni a masa hpe garan gachyan ai sha n-ga, shanhte a makau kaw tsap nna, shanhte a hkum tsup ai rawt jat galu kaba lam a matu, atsam rawng ai hku galaw ra ai lam hpe, n-gun dat tsun shapraw ma ai. Latin America mungdan hta matsan mayan lam grau sawng wa ai masa hpe hkrum katut nga ai Puebla zuphpawng gaw, matsan masha ni a matu asan sha, myihtoi ga hku lata la mai ai lam hpe madi shadaw ai Medellín dawdan ai lam hpe madi shadaw ya nna, n tara ai lam a hkrang masa ni hpe “shinggyim wuhpawng mara” ngu nna tsun shaleng da ai.
91. Tsawra myit gaw tengman ai lam hpe galai shai ya lu ai atsam nga ai; labau hpe galai shai shangun ai teng man ai n-gun atsam rai nga ai. “Matsan mayan lam a npawt nhpang lam ni hpe hparan na matu” shakut shaja ai lam shagu hpe shadut ya nna lam madun ya ra ai npawt nhpang rai nga ai, dai hpe lawan ladan galaw ra ai. “Anhte a mungkan hta nga ai n hkru n kaja ai lam ni a sung dik htum ai rudi ni hpe shamai shatsai ya na matu yaw shada let, myit masin hte hkrak ai hku bawngban lu ai mung masa ninghkring ni hpe grau grau mu lu na hpe ngai myit mada nga nngai.” Kaning rai nme law, “ga ntsa na matsan dik htum ai amyu bawsang ni yawng a hkrap ngu hkrap ngoi ai hpe na lu na matu rai nga ai.
92. Dai majaw, anhte matut nna, “masha sat ai sut masa a dictatorship” hpe mara shagun ra ai, “masha n kau ni a shang gumhpraw gaw grai rawt jat wa nga ai shaloi, dai kabu gara ai masha n law ai ni hkam sha nga ai sut su nga mai lam hte law malawng hpe garan ginhka ai lam mung dai zawn sha rai nga ai. gumhpraw hte seng ai myit sawn sumru ai lam ni a majaw, shanhte gaw, mung shawa a akyu ara a matu sadi maja na lit nga ai mungdan ni a ahkaw ahkang hpe ningdang kau ma ai, n mu lu ai hte law law lang gaw, shi a tara ni hpe langai hkrai hte n hkring n sa shadik shatup ai, zingri zingrat ai uphkang masa nnan langai mi shangai wa nga ai.” Ya aten na masa hpe tara shang shapraw na matu shakut ai theory ni n yawm ai (sh) sut masa myit masa gaw n mu lu ai gat lawk n-gun ni hpe la nna, yawng hpe hparan na matu ra ai ngu ai hpe sang lang dan ai. Raitim, shinggyim masha shagu a sari sadang hpe hpawt ni n re ai sha, dai ni hkungga ra ai, ndai sari sadang hpe n lu la ai ni yawng a matsan ai lam gaw anhte a myit masin hpe tut nawng hkam sha shangun ra ai.
