Daini na Ja Chyum Mungga hpe hti sumru yu ai shaloi e, hkum n tai ai num hpe Yesu shamai ya ai lam na lu ga ai. Madu Yesu gaw, shi matsat ning tup jahten labye hkrum ai num sha langai mi hpe laban shani e tsi shamai ya wu ai. Dai gaw Madu Yesu a kaba dik ai matsan dum lama ai hpe mu lu nga ga ai. Madu Karai a tsawra ai, matsan dum ai, mara raw dat ya ai lam ni gaw, htung hking arawn alai, ripkawp tara ni gaw, laban shani ngu ginhka ai lam n nga ai. Dai gaw aten shagu, shara shagu, amyu ru sai n lata, hpung n gin hka galoi mung  mai galaw ai, lwi dingyang re ai lam hpe tsun da nga ai.

Laban ninghtoi gaw, masha a matu rai nna, masha gaw laban ninghtoi a matu n re ai lam hpe madi madun tsun sang lang ya nga ai. Dai zawn sha ripkawp tara ngu ai gaw, masha ni a matu dingbai dingna n re ai sha, wanglu wanglang nga sa mai ai lam de madung rai ra nga ai. Mai kaja ai lam galaw sa na matu, ahkying aten ala taw nga n ra ai. Ndai lam hpe mung Madu Yesu ja ja tsun shadum ya nga ai. Dai majaw shiga madat nu wa ni e, mai kaja ai magam lam galaw sa na matu, aten nhtawt sit ai sha, ya ya jang kalang ta galaw sa nga u. Raitim n hkru n kaja ai bungli galaw na rai yang, a lang lang ya sha, ya sha sumru dinglik yu u. bai aten la nna, myit yu sawn yu u.