Wa Sarabyin Leo XIV gaw, shi a hkra maga na sinwawp daw mi hpe shaw kau ai hpang, Roma’s Gemelli tsi rung kaw nna, Laban shani pru wa ai hpang, San Peter’s Square kaw, makam masham hpung masha ni hte rau, Angelus akyu hpyi ai lam galaw lai wa ai.
mun hku law ai nawku bu hkawm sa du masha ni hte manam ni gaw, Wa Sarabyin hpe shakram na matu hte bat shagu na Marian nawku daw jau ai lam hta shi hte rau shang lawm na matu, Square kaw sa du shanglawm ma ai.
‘Kehta hte seng ai hpe Ketha hpe jaw mu’
myit sumru ai lam hta, Wa Sarabyin Leo gaw, “Yesu a hpaji rawng ai ga langai mi hpe tsun dan ai: ‘Dai majaw, Kehta hte seng ai hpe Kehta hpe, Karai Kasang hte seng ai hpe Karai Kasang hpe jaw mu’.”
Yesu’ gaw shi hpe hkalem na matu yaw shada ai ahkun hkanse hte seng ai ga san hpe htai ai re. Raitim, “Sara a mahtai” Wa Sarabyin tsun ai gaw, “hpaji rawng ai, hpa majaw nga yang, dai gaw shi hpe hkalem hkalau ai lam hpe koi lu shangun nna, shi hpe chyam dinglik na matu shakut ai ni a masu hkalem ai lam hpe dan dawng shangun ai”.
Ndai daw hpe hti ai shaloi anhte galaw ra ai dawdan lam hpe Wa Sarabyin Leo tsun shapraw da ai: “Yesu hta labau hpe n hkrit ai sha, labau kata kaw nga na matu du sa ai Karai Kasang hpe myit sumru nga ga ai. Shi a mungdan gaw shinggyim masha ni a lit magam ni hpe n jahten kau ya ai”.
Teng man ai lam hpe tsun shaga, kaja ai amu hpe wang lu wang lang galaw u
Wa Sarabyin matut tsun ai hta, Yesu gaw “n-gun n rawng ai sha, tinang hkum hpe sha myit mada ai lam hte n tara ai yaw shada lam ni kaw na lawt lu ai, yawng hta grau nna Karai Kasang a Mungdan hte Shi a dinghpring ai lam hpe tam ai” ngu shaga nga ai. Dai aten hta sha, Kabu Gara Shiga hta Yesu hpe shakawn ai ni a masu hkalem ai lam hpe, “shanhte a yaw shada ai lam gaw kaja ai hte tsan gang nga ai raitim” ngu ai hpe Wa Sarabyin myit yu shangun ai.
Ga shadawn, Wa Sarabyin Leo tsun sang lang dan ai hta, “Ndai gaw, ‘Kehta a arai hpe Kehta hpe, Karai Kasang a arai hpe Karai Kasang hpe jaw u’ ngu ai lachyum nan rai nga ai: tengman ai, mayam hkrit tsang ai lam (sh) masu hkalem ai lam n nga ai, kaja ai amu galaw na matu lawt lu ai” ngu ai lachyum rai nga ai.
Angelus ngut ai shaloi, Wa Sarabyin Leo XIV gaw, lai wa sai nhtoi ni hta shi a matu akyu hpyi ya nga ai ni yawng hpe chyeju dum let, “Nanhte a madi shadaw ai lam hpe ngai teng sha hkam sha lu sai.Chyeju kaba sai!”
Shi matut tsun ai hta, “Gemelli Policlinic kaw na tsi sarawun ni, tsi sara/num ni, magam gun ni yawng hpe laksan chyeju dum ai lam tsun ai”.
