DINGHKU HTE HKUNGRAN AI LAM HPE LAWAN LADAN MAKAWP MAGA RA AI
Wa Sarabyin Leo XIV gaw, tsi lajang hkam la ngut ai hpang, shawng ningnan lang na (General Audience) shawa hpawng the hkrum shaga ai hta, yawng a akyu hpyi ga ni hpe chyeju dum let, Karai Kasang a kaja ai hte matsan dum lama ai hpe kam hpa na matu, kam sham ai hpung masha ni hpe n-gun jaw lai wa ai. Vatican zuphpawng II a ‘Gaudium et Spes’ ngu ai laika buk hpe matut myit sumru let, dinghku hte hkungran ai lam gaw shinggyim wuhpawng a npawt nhpang rai nna, dai hpe makawp maga na matu gaw moi na hta grau nna ahkyak ai lam hpe ahkyak shatai tsun shalawm da nga ai.
Wa Sarabyin sang lang dan ai hta, hkungran ai lam gaw, prat hte tsawra myit a hku hkau lam rai nna, madu jan madu wa langai hte langai hkum tsup ai hku ap nawng hkat nna, “hkum hkrang langai sha” tai wa ai lam re. Shan a hku hkau lam gaw, shada da hkungga lara ai lam, tsep kawp sadi dung ai lam, grin nga lu ai kahkyin gumdin lam, matsan dum lama ai lam, tinang hkum hpe jaw ya ai tsawra myit ni hta gawgap ra ai, Nawku hpung hpe Hkristu tsawra ai lam hpe madun dan ra ai.
Ma ni hpe hkap hkalum la ai, makawp maga ai, hpaji jaw ai lam ni gaw dinghku de ai ni a ahkyak ai lit re ai lam hpe mung madi madun da ai. Kanu kawa ni gaw, shinggyim masha ni a prat hpe lit la let, atsawm sha hkrang shapraw da ai myit masin hte Nawku hpung a sharin achyin ai lam ni hpe woi awn let, matut nna bau maka ai sharin shaga ai hku nna, Hpan Madu Karai Kasang hte rau jawm galaw na matu shaga la hkrum ma ai. Shinggyim masha shagu a asak hpe ma hkum kap ai aten kaw nna makawp maga hkungga ra ai, ma hkum shabrai kau ai hte ma sat ai lam ni hpe ninghkap kau ra ai.
Wa Sarabyin Leo XIV gaw, dinghku prat a hkam kaja lam gaw langai hkrai hte shinggyim wuhpawng ting a hkam kaja lam hte grai matut mahkai nga ai hpe chye na let, dinghku hte hkungran ni a hkam kaja lam a matu atsam dat shakut shaja na matu mung masa, htunghking, shinggyim nga pra masa ningbaw ningla ni hpe saw shaga da nga ai. Mungkan ting na dinghku ni hpe lam madun, makawp maga ya na matu, Nazaret mare na Chyoi Pra ai Dinghku kaw akyu hpyi let, shi a mungga hpe hpungdim dat ai.
