Daini na Ja Chyum Mungga hpe hti sumru yu ai shaloi e, Kasa shi lahkawng hpe Yesu lata la ai lam na la lu ga ai. Madu Yesu gaw, shana tup akyu hpyi nna, kasa shi lahkawng hpe lata la ai nga nna, daini na kabu gara shiga hta mu lu nga ai. Madu Yesu gaw hpa amu mi galaw law, shawng ningnan e, Kawa Karai hte matut mahkai nna, Kawa Karai a ra sharawng hpe tam nna, galaw sa ai. Anhte mung kaning re ai amu magam mi galaw law, akyu hpyi ai hte, Madu Karai a ra sharawng ai hte maren galaw sa chye na matu sharin ya nga ai. Lam shagu hta e, Madu Karai kaw hpang da nna, shaman chyeju ni hpe hkam la nga ga.
Madu Yesu lata la ai kasa ni a jahpan hta e, n bung ai shingdu labau hte atsam marai ni hpe anhte mu mada lu nga ga ai. Ndai kasa ni hta n bung ai lam ni nga nga ai raitim, Madu Yesu a hpang hkan na matu shanhte ni myit hkrum kahkyin gumdin nga ma ai. Dai ni Nawku hpung kaw nna, San pra ai Simon hte Jude a poi ninghtoi hpe galaw nga ga ai. Ndai San pra ai yan mung kaga ga re ai sasana magam lam kaw nna, kahkyin gumdin lam hpe madun dan nga ai. Shan lahkawng kaw nna, anhte sharin la ra ai lam gaw, n bung ai ginhka ai lam yan ni hpe hkap la nna, sasana magam bungli ni hpe tup hkrak galaw sa wa na matu, anhte hpe sharin shaga ya nga ai re.
San pra ai Simon hte San Jude yan a mying la ai ni yawng hpe kabu gara ai poi shani ria mu ga ngu shakram dat ga ai.