Ndai tsawra myit gaw hpunau nauna ni hpe n tsawra yang Karai Kasang hpe teng sha tsawra lu na n rai”, nga nna Wa Sarabyin Leo XIV gaw October shata 25 ya shani na Angelus munnga hta tsun lai wa ai.
San Peter’s Square kaw zuphpawng nga ai makam masham hpung masha ni hpe tsun shaga ai shaloi, Wa Sarabyin gaw, San Mahte a Kabu Gara Shiga hpe myit sumru yu ai, dai hta Tara sara langai mi gaw, gara hkang da ai ga gaw kaba dik htum re ngu san nna, Yesu hpe chyam dinglik ai lam galaw ai.
Yesu gaw Tara Jahprang laika hta lawm ai ga hte bai htang ai: “Na a Karai Kasang Madu hpe na a myit masin mahkra hte, na a wenyi mahkra hte, na a myit mang mahkra hte nang tsawra lu na ndai.”
Dai hku galaw ai hta, Hkristu gaw Karai Kasang hte anhte a hku hkau lam a madung hta tsawra myit hpe tawn da ai lam Wa Sarabyin Leo sang lang dan ai.
Karai Kasang hte tinang a hku hkau lam
Karai Kasang nga ai, Shi chyu sha Karai Kasang re, shing nrai, Chyahtum Chyalai n-gun rawng ai wa re ngu ai hpe yin la ai hte sha n mai byin ai, “Madu gaw anhte hte langai hkrai hku hkau lam hpe tam nga ai: tengman ai Karai Kasang langai sha anhte a Karai Kasang tai mayu ai”, nga nna Wa Sarabyin tsun ai.
Wa Sarabyin Leo matut tsun ai hta, Karai Kasang hpe tsawra ai myit gaw, shinggyim masha ni a ra sharawng ai lam a sung htum ai hkrang shapraw ai lam rai nna, Shi hte kanawn mazum ai hta hpring tsup ai lam hpe mu lu ai. Anhte a tsawra myit gaw, “anhte a shawng e galoi mung nga ai” Karai Kasang a tsawra myit hpe bai htang ai shaloi, tengman ai tsawra myit tai wa ai.
Dai mahtai gaw, masha hkum hkrang ting: myit masin, salum, wenyi hte hkum hkrang yawng shanglawm ra ai.
Kaga masha ni hpe Hkristu a myi hte mu mada ai
Shawng na hkang da ai ga hte rau, Yesu gaw lahkawng ngu na hkang da ai ga hpe mung tawn da ai: “Na a htingbu wa hpe na a hkum hte maren tsaw ra lu na ndai”.
Ndai tara lahkawng gaw, npawt nhpang langai kaw nna pru wa ai re lam, Wa Sarabyin sang lang dan ai. Karai Kasang hte ni htep ai hku hkau lam hku nna, anhte hkum anhte mung, kaga masha ni hpe mung Hkristu a myi hte mu lu na matu sharin la lu ga ai.
“Ndai hku nna, tinang hkum hpe sha myit ai myit hpe dang kau lu nna, tinang hkum hpe tsawra ai myit pyi, tsawra myit tai wa ai: anhte a nga pra lam gaw kaga langai ngai hpang de kayin wa nna, anhte a makau grup yin na ni a matu kumhpa langai mi tai wa ai”, nga nna tsun ai.
Tsawra myit gaw makam masham a npawt nhpang jaw ya ai
Dai hpang, Wa Sarabyin Leo gaw, tsawra myit gaw Nawku hpung a prat hte sasana magam hpe shadut ya ai ngu ai hpe chye na ai, Ma Yesu a San Pra ai Thérèse a ga hpe bai myit dum mai ai.
“Tsawra myit sha”, shi ka da ai hta, tsawra myit htum mat yang, kasa ni Kabu Gara Shiga hkaw tsun na n re, nga nna mung tsun shalawm da ai.
Tsawra myit n nga yang, “anhte a makam masham gaw shi a madung lam hpe sum mat na, anhte a kaja ai magam bungli ni gaw arawn alai sha rai mat na, anhte a myit mada shara gaw kaman lila sha rai mat na re” nga nna Wa Sarabyin sadi jaw da nga ai. Dai majaw Karai Kasang hpe tsaw ra ai hte kaga masha ni hpe tsaw ra ai ngu ai gaw garan ginhka n mai nga ai.
“Shi a Kasha Yesu hta anhte hpe shawng tsawra ai Kawa langai a kashu kasha ni hku nna sha n rai yang, anhte a htingbu wa hpe teng sha tsawra lu na n rai”, nga nna tsun ai.
Wa Sarabyin Leo gaw, makam masham hpung masha ni hpe, “hkang da ai ga yawng hta kaba dik htum hpe hkap la nna sak hkrung lu ai myit masin nnan a chyeju” hpe Madu kaw hpyi nem na matu saw shaga da ai.
