33 rd Ordinary Sunday Year-B
Introduction
Hkristu hta tsawra ai nu wa hpu nau ni e, ndai bat gaw pranwan ladaw hta laban (33) rai nga
ai. Shaning B a Nawku daw jaw ai ladaw mung htum wa ai maga de du wa sai rai nga ai. Du
wa na bat Hkristu Hkawhkam poi nhtoi ngut yang nawku daw jaw ai ladaw ningnan de du
shang wa sa na rai nga ai. Dai majaw dai ni na mungga hku nna nawku daw jaw ai lam
ningnan hta gara hku na shang lawm ra na lam hpe mung shadum ya ai rai nga ai. Nadai bat
na la lu na Karai Kasang a mungga ni yawng gaw “hpang jahtum na nhtoi hta byin wa na
lam ni hpe” tsun da ai rai nga ai. Anhte shingyim masha ni yawng gaw hpang jahtum na
nhtoi hta “ngai hpa byin na hpe chye mayu ai” rai nga ai. Hpang jahtum na nhtoi hta hpa
byin na hpe myit tsang ai ni rai nga ma ai. Kabu gara shiga hta mung Madu Yesu gaw shi bai
du sa ai shaloi byin wa na lam ni hpe hkrit hpa lam hku nna tsun da ai rai nga ai. Dai majaw
ndai bat na mungga hpe kabu gara shiga ngu nna tsun na pyi yak nga ai. Ritimung, Madu
Yesu gaw anhte hpe mungga jaw shadum nga ai.
Short Story
Jawng langai mi hta Sara langai mi gaw shi a jawng ma ni hpe ga san ai lam larai nga ai. Shi
a ga san gaw “daini Mungkan hten na rai yang nanhte ni hpa hpaw galaw na ta?” ngu ai ga
san rai nga ai. Nkau jawng ma ni gaw “tinang a kanu kawa ni hpang de sa na, shanhte hte rau
nga na” ngu nna tsun ma ai. Jawng ma nkau mi gaw “tinang kamsham ai Karai Kasang kaw
akyu hpyi na, tinang a mara ni hpe hpyi nem tawngban na” ngu nna tsun ai. Dai jawng ma ni
hta na jawng ma langai mi gaw kaga jawng ma ni hte n bung ai hku Sara hpe tsun ai gaw
“ngai na matu gaw shani shangu nga ai zawn sha nga na re. Hpang jahtum na matu ntsang ai.
Hpang jahtum na nhtoi na matu ngai galoi mung jing jing rai nga ai” ngu nna tsun dat ai lam
rai nga ai. Dai jawng ma zawn anhte ni mung hpang jahtum na nhtoi a matu jing jing rai nga
sai kun? Tinang hkum tinang bai myit la ra nga ai. Tinang a Mungkan ga na asak htum ai
shaloi, tinang a matu hpang jahtum nhtoi rai nga ai. Madu Yesu bai du sa ai aten, “Second
Coming” mung anhte a matu hpang jahtum nhtoi rai nga ai.
Kaja wa Madu Yesu ra sharawng ai gaw shani shangu anhte sak hkrung hkawm sa ai aten hta
hpang jahtum na nhtoi zawn hkawm sa na hpe ra sharawng ai rai nga ai. Anhte a asak aprat
hpe manu shadan let hkawm sa na hpe ra sharawng ai rai nga ai. Matthew laika 25: 1-13 hpe
hti ai shaloi “Num nnan shi a lam” hpe mu lu ai rai nga ai. Shanhte yawng gaw “la nnan” hpe
a la nga ai ni rai nga ai. Shanhte a bang dung mung “la nnan” hte rau kungran poi de shang
lawm lu na matu rai nga ai. Shanhte hta nbung ai lam langai mi gaw “hkyen lajang ai lam”
rai nga ai. Num nnan shi hta na marai manga gaw sau shajan la sa ai rai nga ai. Sau shajan la
sa ai num sha marai manga gaw hkyen lajang ai lam hta grai ning tawn ai masha ni rai nga
ai. Kaga Num nnan marai maga gaw hkyen lajang ai lam hta ningra ai hpe mu lu nga ai. Ndai
dinghta ga hta anhte hkawm sa ai gaw “hpang jahtum na nhtoi hta Karai Kasang hte rau nga
lu na matu rai nga ai” . Dai majaw anhte hkyen lajang ai lam hta byin ai rai yang gaw hpang
jahtum na nhtoi hpe n hkrit na rai nga ai. Hpang jahtum nhtoi a matu hkyen lajang ra ai lam ni law law nga ai hta na gabaw (II) hte tinang prat hpe hkyen lajang lu na matu tsun dan
mayu ai..
(1) Be faithful! Karai Kasang hpe sadi dung ai hte sak hkrung hkawm sa ra ai.
Karai Kasang gaw gawng kya ai, aput angun ai, sadi n dung ai Israel amyu sha ni hpe lam
amyu myu hku na, sadi dung let woi awn lai wa ai rai nga ai. Karai Kasang gaw sadi dung ai
Karai Kasang rai nga ai. Dai majaw shi gaw anhte hpe sadi dung let anhte a asak aprat hpe
hkawm sa na matu ra sharawng ai mung rai nga ai. Dai ni na ten hta sadi dung ai masha ni
hpe tam la na grai yak wa ai ten mung rai wa ai. Anhte a mahkau grupyin hta sadi n dung ai
lam ni amyu myu na lu, mu lu taw nga ai. Madu jan gaw madu wa ntsa sadi n dung ai, kahpu
kanau shada da sadi n dung ai, bungli magam gun ai masha gaw tinang a lawban wa ntsa e
sadi n dung ai ndai zawn lam amyu myu anhte ni na la, mu la sa ga ai. Anhte ni mung Isarel
amyu sha ni hte maren sha rai nga ai. Lam amyu myu hku nna Karai Kasang hpe sadi n dung
ai masha ni tai nga ai. Ndai bat na mungga hku nna Karai Kasang gaw anhte hpe shi shaga da
ai hte maren hkawm sa na matu saw shaga taw nga ai. Jau ni gaw Jau prat hku nna, Mama tai
ai ni mung Mama prat hku nna, Kun dinghku de ai ni mung kun dinghku prat hte kangka sadi
dung let shi hpang kan nang na matu ra sharawng ai rai nga ai. Kangka sadi dung ai wa gaw
hpang jahtum na nhtoi hpe atsawm sha tawt lai la lu na rai nga ai. Dai majaw hpang jahtum
na nhtoi hta anhte gun sa ra ai sau langai mi gaw “Kangka sadi dung ai lam ngu ai sau” rai
nga ai.
(2) Be Charitable! Tsaw ra myit hte anhte a prat hpe gaw gap ra ai.
Yawhan a laika langai (4:16) hta “Karai Kasang gaw tsawra ai myit rai nga ai; tsaw ra ai lam
hta e a nga nga ai wa gaw, Karai Kasang hta e a nga nga ai rai nna, Karai Kasang mung shi
hta e a nga nga ai” ngu nna tsun da ai hpe mu lu nga ai. San Paulu Korinhtu hpung masha ni
kaw shangun dai ai laika (13: 4-) hta “Tsawra myit gaw galu kaba nga ai, sumnung shingdi
nga ai; tsaw ra myit gaw manawn masham n nga ai, grang ai ga n tsun ai, gumrawng
gumtawng n rawng ai; n se n sa n galaw ai, tinang a akyu n tam ai, sin pawt ka htet n nga ai,
mara n tam nga ai. N ding n man ai hta n kabu ai sha, dai teng man ai hte rau kabu gara nga
ai; yawng mayawng hpe hkam mana nga ai, yawng mayawng hpe kam sham nga ai, yawng
mayawng hpe myit mada nga ai hte yawng mayawng hpe shakut sharang nga ai” ngu nna
sharin shaga da ai rai nga ai. Dai majaw anhte ni yawng gaw Karai Kasang hta nga nga na
matu tsawra myit rawng ra ai. Dai anhte hta rawng ai tsaw ra myit gaw jasi (dead) tsawra
myit n rai na matu gaw grai ahkrak nga ai. Madu Yesu gaw Karai Kasang hpe tsaw ra ai ngu
ai gaw “damya hte hkrum nna ganoi noi si maw ai masha hpe Samari Masha langai mi
garum ai” hpe ngu ai rai nga ai ngu nna a asan sha tsun da nga ai. Matsan mayan ni, ra
kadawn nga ai ni hpe tsawra myit hte daw jaw ai lam gaw hpang jahtum na matu wan sau
hpe shajin ai lam rai nga ai. Dai tsawra myit rai nga ai sau hte anhte hkawm sa ai rai yang
gaw hpang jahtum na matu nstang ra sai rai nga ai. Hpang jahtum nhtoi hpe n hkrit ai jawng
ma zawn rai wa na rai nga ai.
Conclusion
Hpang jahtum hku nna, Madu Yesu bai du sa ai aten gaw anhte a matu “a time of reward,
Karai Kasang anhte hpe shagrau ai nhtoi” rai nga ai. Raitimung, Kasha a kungran poi hta
hkungran palawng n hpun ai masha hpe “jinghku wa e, hkungran ai hpun palawng n bu
hpun ai mi, nang kaning rai nang e shang lu n ta?” ngu nna anhte hpe san na ra ai. Dai majaw
hpang jahtum na nhtoi na matu ready ngu ai gaw “mungkan pyaw hpa lam ni hpe tam let nga
na matu nrai nga ai” hpe chye na ra ai. Hpang jahtum nhtoi a matu “Ready” nga ai ngu ai
gaw “Karai Kasang a ga hpe kam let, tinang a shaga la ai lam hpe manu shadan let hkawm sa
ai. Dai shaga lam hpe hkan sa, shakut ai shaloi gawng kya lam ni nga timung, galoi
mung myit yawn myit malai let shi a hpang e, kangka sadi dung ai hte hkawm sa ai prat hpe
ngu ai” rai nga ai. Dai majaw anhte shani shangu asak hkrung hkawm sa aten hta hpang
jahtum na nhtoi zawn hkawm sa ai re yang gaw hpang jahtunm nhtoi a matu hkyen lajang ra
ai lam ni hpe chye wa nna, dai lam ni hpe hkyen lajang lu na rai nga ai. Hpajang jahtum na
nhtoi ngu ai hpe anhte n chye ga ai. Raitimung, hpang jahtum na nhtoi hpe atsawm sha
hkyen lajang lu na shaman chyeju hpe Wa Karai Kasang kaw hpyi nga ga.
Akyu hpyi saga oh hpan madu karai kasang e chyeju mahakra matu chyeju dum ai hte nang
wa hpe grau nna kam sham tsawra chyechyang lu ai hte nang wa a kabu gara shiga hpe anhte
a sak hkrung lam hta hkaw tsun sak se hkam lu na matu ra kadawn nga ai myit yan marai hte
n gun atsam chyeju ni hpe mung jaw ya rit anhte a madu hkristu a marang e hpyi nyem nga
ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai
laban gaw pranwan ladaw hta. ..hkun mali… ngu na lanban rai nga ai hti ang ai ja chyum
mungga ni gaw chyum mungga daw langai ..Daniela a laika 12: 1-3 .chyum mungga daw
lahkawng Hebre laika 10: 11-14,18 kabu gara shiga Marku 13: 24-37
Ndai jachyum mungga ni hpe hti nna myit sumru yu let hpawt ni na nawku daw jau lamang
ni hpe woi nga ga law
