“Shaloi Yesu gaw, Na myi mu lit ga; na a kam sham ai gaw nang hpe shamai ya nit dai, ngu nna
shi hpe tsun ai.” ( Lk 18: 35 – 43 )
Tsawra ai shiga madat Nu Wa Hpu Nau ni, daini na la ai Ja Chyum Mungga hta, makam masham
myit kaba hte Madu hpe hpyi nem yang, mau hpa chyeju ni shi Madu jaw ya nga ai lam, na la lu
nga ga ai.
Daini na Ja Chyum Mungga hta na, myi nmu ai wa a prat hpe yu jang, grai matsan dum hpa rai
nga ai. Myi nmu ai majaw, makau grup yin manaw manang ni mung nau n nga, hpa bungli mung
nchye galaw sha, rai n na, mawhpyi hpyi sha hkawm ra nga ai. Shi a prat hta kade mi, myit
garen, myit gaji nna, nga shalai wa ai hpe myit yu mai nga ga ai. Myi she nmu tim, makam
masham na grai kaja ai majaw, Madu Yesu galaw ai, mau hpa law law hpe na da nna, Madu hpe
grai kam sham ai wa rai nga ai. Myi nmu ai wa a, Makam masham gaw, Madu Yesu galaw lai wa
ai, mau hpa amyu myu ni hpe mu la ai ni hta, grau nna kaba nga ai hpe, mu lu nga ga ai.
Ndai myi nmu ai wa hpe, Maku a kabu gara shiga 10: 46-52 kaw gaw, Bartimaeus nga mying
hpe mu lu nga ga ai. Bartimaeus wa gaw, myi she nmu tim, shi a makam masham myi greng ai
majaw, Madu kaw nga ai, mauhpa atsam ni hpe asan sha mu lu nna, Madu Yesu a mau hpa
chyeju hte myi bai mu lu lai wa ai.
Myi nmu ai wa kaw nna yu la mai ai, kasi kaja ni law law nga nga ai. 1. Myi nmu ai majaw, jam
jau jam hkaw rai, nga pra ra tim, myit ndaw, myit hten ai lam n nga ai sha, nhkrit ngaya ai sha
hpyi sha let, kan bau lai wa ai. Jam jau jam hkaw, ru yak kin dut, ka de hkrum tim, shi a prat hpe,
asum njaw ai sha, sak hkrung hkawm sa lai wa ai. Anhte hkum ngau shagu mung, mayak
mahkak, tsin yam tsin dam ni, hkrum ai ten, ndai myi nmu ai wa na prat hpe yu nna, ngun la mai
nga ai. Anhte law malawng gaw, myi mu ai ni rai nga ga ai. Mawhpyi nhpyi sha ra nga ga ai.
Madu Karai Kasang, anhte ni hpe, shaman chyeju ni law law jaw da ya nga ai. Madu jaw da ai,
shaman chyeju, n gun atsam, nyan marai hpaji, ni hpe jai lang nna, anhte a prat hpe Madu hte rau
shakut hkawm sa nga ga.
2. Myi she nmu tim, shi a makam masham myi mu ai majaw, Madu a mauhpa atsam hte, myi bai
mu ai lam na lu nga ga ai. Bartimaeus gaw, shi na la ai, Madu Yesu a mauhpa atsam ni hpe kam
hpa, hkap la ai wa rai nga ai. Shi a myit hta, Madu Yesu hte hkrum jang, shi myi mu lu na hpe
mung teng teng kam hpa nga ai. Daimajaw, Madu Yesu sa du hkam sa wa ai lam hpe chye ai
shaloi, Son of David, Have mercy on me! Nga na, aja a wa jahtau lai wa ai a majaw, Madu Yesu
hte hkrum la nna, myi mu ai mauhpa chyeju hkam la ai wa sai. Anhte mung, Bartimaeus zawn,
makam masham ngang grin ai ni tai ra nga ga ai. Madu hpe ja ja kam hpa nga yang, anhte ni
mung Madu kaw na mauhpa chyeju wunli ni hkam la hkam sha lu na rai nga ga ai.
Anhte ni yanwg mung, Bartimaeus zawn, jam jau jam hkaw, tsin yam tsin dam, mayak mahkak,
ni yawng hpe Madu Karai Kasang hpe kam sham ai myit hte Shi Madu hte rau hkawm sa ai a
marang e, tawt lai lu nga u ga. Yawng hpe Madu Karai Kasang shaman ya nga u ga.
