“Shaloi shi gaw shi a mayam marai shi shaga la nhtawm gumhpraw joi shi hpra shanhte hpe ap ya da nna, ngai bai wa ai du hkra ndai hte hpaga ga mu, ngu nna shanhte hpe hkang da mu ai.” ( Luka 19: 11-28 ) Tsawra ai shiga madat Nu Wa Hpu Nau ni e, Daini na lu ai ja chyum mungga hta arawng lu ai, mungdan a daru magam tai wa na, masha langai mi gaw, shi a mayam ni hpe gumhpraw joi shi hpra jaw nna, hpaga ga shangun ai lam, na lu nga ga ai. Arawng lu ai wa bai du wa yang, mayam langai mi gaw, htam shi amyat lu ai hpe sa jaw ai, hpang langai mi gaw, htam manga amyat lu ai hpe jaw dat ai, hpang jahtum na wa gaw, arawng lu ai wa, n tara ai lam tsun nhtawm, hpa amyat mung nlu ai lam tang madun lai wa ai.
Daini na lu ai Ja Chyum mungga hta na, Arawng lu ai wa gaw, Madu Yesu rai nga nna, gumhpraw ap da hkrum ai mayam ni gaw, shi a sape ni hte anhte shinggyim masha ni rai nga ga ai. Madu Yesu gaw, mungkan ga de yu sa nhtawm, hkye hkrang la ai lam ni hpe shadik shatup la ngut jang, sumsing lamu de lung mat wa ai hpe Ja Chyum mungga hta na la kam sham nga ga ai.
Madu Yesu Sumsing Lamu de lung mat wa ai hpang, Chyoi Pra ai Wenyi yu wa na, sape ni tsa e yu hkrat nna, shaman chyeju jaw ya lai wa ai. Anhte Madu a prat dep mayam ni hpe mung, shi Madu gaw, gumhpraw hte bung ai, n’gun atsam, nyan marai, hpaji ni, ja sut gan ni, law law hpe ap da ya nga ai. Madu Karai Kasang kaw nna ap da ya ai, Sali wunli, ja sut gan, n’gun atsam, nyan marai ni hpe, anhte ni gara hku jai lang nga ai kun? Shawng na mayam lahkawng zawn, amyat ni law law lu na matu shakut nga ai kun, shing nrai, Madu jaw da ai, atsam ni, Sali wunli, ja sut gan ni hpe, hpaga n ga ai sha lup da nga ai kun, ngu ai hpe myit sumru yu ra nga ga ai.
Anhte lu la hkam sha nga ai Sali wunli ni, ja sut gan ni, arung arai ni, nyan marai, n’gun atsam, hpaji ni gaw, anhte ni a Wenyi hkye hkrang la ai lam lu na matu hte, Madu Karai Kasang a hpung shing kang grau dan dawng wa na matu rai nga ai. Anhte hpe ap da ai, Karai Kasang a chyeju ni hpe anhte atsawm njai lang ai rai yang gaw, hpang jahtun na mayam wa zawn, “n hkaw n shawp ai mayam e” nga shaga hkrum nna, jeyang ai hkrum na rai nga ai. Karai Kasang gaw, shi ra sharawng ai hku, sak hkrung hkawm sa na matu, anhte ni hpe aten ni, ahkaw ahkang ni law law jaw let, myit galu kalang hte la nga ai.
Dai majaw, shi Madu jaw da ai, chyeju sali wunli ni hpe rap ra ai hku jai lang let, Madu ap da ai chyeju ni hte amyat ni law law hpe bai jaw lu ai ni byin tai wa hkra, shakut hkawm sa nga ga. Hpang jahtum, anhte ni Madu hpe bai ap ai shani, mayam lahkawng zawn, “Madu gaw Ara, kaja ai mayam e, nang gaw amu kaji hta kangka rai nit dai” nga nna anhte ni hpe shagrau na rai ngai. Madu a kangka ai mayam ni bai tai hkra shakut hkawm sa nga ga.