“Nanhte mahtang a kyu hpyi ai shaloi, nta chyinghka hpe la da nhtawm, myit the n mu lu ai nanhte a kawa kaw hpyi mu.” ( Matthew 6:6 )
Tsawra ai nu wa hpu nau ni, dai ni “Akyu hpyi ai” lam hta grau nna manu dan lachyum pru ai hku hpyi htinglu lu na matu n-gun jaw mayu ai.
“Karai Kasang gaw shi a Kashu Kasha ni a hpyi jahtau ai nsen hpe madat ya nga ai” ngu ai makam gaw kalang marang anhte hpe akyu hpyi ai lam hte seng nna chye na shut shangun chye nga ai.
Galu kalang rai ga si law law shatsawm let akyu hpyi yang Karai Kasang grau nna madat ya na re ngu chye na shut mai nga ai. Anhte hpyi jahtau ai lam hpe Karai Kasang madat ya ai lam gaw anhte galu galang rai akyu chye hpyi ai a majaw nrai nga ai. Akyu hpyi ai aten hta shi Karai Kasang hpe nang saw shaga lu ai hte shi hkum nan anhte hte matut mahkai ga shaga lu ai majaw she rai nga ai. Dai majaw akyu hpyi ai hta anhte a kraw hpe hpaw let shi hkum nan hte grau lachyum pru ai hku matut mahkai nna hpyi htinglu chye na grai ahkyak nga ai.
Madu Yesu gaw Mahte laika 6: 7-8 hta “Nanhte akyu hpyi ai shaloi maigan masha ni zawn lachyum n pru ai ga ni tsun kahtat htap hkum rai myit, dai maigan masha ni gaw shanhte galu galang akyu hpyi ai majaw, shanhte a hpara ni madat ya na zawn nawn nga ma ai. Nanhte chyawm gaw shanhte hte hkum bung nga myit, nanhte a Kawa gaw nanhte garai nhpyi ai kaw nna pyi, nanhte hta hpa ra nga ai hpe chye ya nga ai” nga nna “Akyu hpyi ai” lam hpe yu jut nnan, ning mu nnan chye na ai lam nnan hku tsun shadum da ai re. Madu Yesu garai ndu sa shi yang Karai Kasang a Myu sha ni gaw Akyu hpyi ai lam hpe lit magam shing nrai htung tara langai mi hku hkap la da ma ai. Shanhte a matu hpyi hting lu ya na matu sha hpyi ma ai. Madu Yesu bai sharin shaga ai gaw, Karai Kasang gaw tsawra chye dik ai Kawa Kaja re hte maren tinang a kashu kasha ai a ra kadawn ai lam ni hpe nhpyi shi ai kaw na pyi chye ya nga ai; jaw mayu taw nga ai. Yawhan a laika 15:7 hta shi tsun ai gaw, “Nanhte ngai hta noi nga nna, nye mungga mung nanhte hta noi nga ai rai yang gaw, nanhte hpa hpyi mayu yang hpyi mu, hpyi ai hte maren nanhte lu na myit dai” nga nna sharin shaga da nga ai. Dai majaw nu wa hpu nau ni, Karai Kasang gaw anhte a hpyi jahtau ai nsen hpe madat ya nna jahpring shazup ya na ra sharawng nga ai hpe dum nga ga. Anhte a kraw kata na ra sharawng ai lam ni hpe jaw ya na sha, shi galoi mung a myit nga ai re.
Nu wa hpu nau ni, Akyu hpyi ai lam hta Karai Kasang hte grau nna ni htep ai hku matut mahkai nga lu na matu gaw “Karai Kasang gaw shi a kashu kasha ni a hpyi jahtau ai nsen hpe manu shadan ai hte madat ya nna mahtai jaw ya ai tsawra chye dik ai Kawa kaja re” ngu nna kam sham nga na gaw grai ahkyak nga ai. Ndai zawn kam sham wa lu ai hpang, anhte a kraw hpe sharai ya nna shi ra sharawng ai hte jahpring ya let shi hta grau maju jung wa lu na matu aten jaw ra nga ai. Hpa majaw nga yang Karai Kasang gaw anhte ra ai hpe chye dik re ai hte anhte a matu kaja dik hpe jaw ya mayu ai wa re majaw anhte hpyi nga na malai shi hpe mahtang anhte prat a matu ra kadawn ai lam ni hpe jahpring ya na ahkang jaw ai gaw grai mai nga ai. Shi anhte a matu Kaja dik ai ni hpe mau hpa atsam hte jaw ya na ra ai.
Yeremia laika 33:3 hta “Ngai hpe shaga e, ngai nang hpe htan ya na nngai; nang hpa mung n chye lu ai mauhpa amu ni hte mau kajawng na zawn re ai amu ni ngai nang hpe tsun dan na de ai” nga nna mung anhte hpe n-gun jaw da nga ai. Dai majaw Kawa Karai Kasang kaw anhte hpyi ai hte maren shi jaw ya na hpe kam sham nga ga. Shi anhte hte ga shaga mayu nga ai; shi a myit ra ai lam anhte grau chye chyang wa na hpe shi ra sharawng nga ai; shi a salum kata na, anhte a matu hkam sha lam hpe chye na shangun mayu nga ai. Anhte a kraw kata hta shanu nga ai Chyoi Pra ai Wenye mung Kawa Karai Kasang a sung htum ai yaw shada lam ni hpe hpaw madun ya nga ai.
Dai majaw Akyu hpyi ai ten hta anhte ga tsun nga na malai, Karai Kasang a salum htuk htak ai nsen hpe na hkra madat ya aten la ga; anhte a prat hta shi a myit ra ai lam ni jahpring ya na shi hpe aten jaw ga.
