“Dai Naw Ku Htingnu gaw, reng hkik ai nlung hte mung, alu ni the mung, kumhpa mawn sumli da ai rai nga ai.” ( Luka 21: 5-11 )
Tsawra ai shiga madat nu wa hpu nau ni, daini na lu ai Ja Chyum mungga hta, Madu Yesu gaw Jerusalem mare kaba na, hkik hkam tsawm htap dik ai, Nauku Htingnu kaba, hten za mat na hpe tau nau nna, tsun da nga ai lam na la lu nga ga ai.
Lahkawng lang ngu na Jerusalem na Nawku Htingnu hpe ngut hkra gaw gap lu na matu, shaning 46 ning ten la nna gaw gap lai wa ma ai. Dai prat na masha ni a ladat mahkra shaw nna, nlung kaba ni, kaja dik htum ai hpun ni, ja lung seng ni law law, bang nna gaw gap lai wa ma ai. Masha ni a nyan marai hpaji ni, munkan ga na manu dan dik htum ai rai ni hte gaw gap da ai majaw, Israela masha ni yawng a matu, hpa hte galai n lu hkra manu dan dik ai Nawku Htingnu rai nga ai.
Dai majaw, Jerusalem Nawku Htingnu hpe, Sumsing lamu, ginding aga, a gawng malai hku hkap la nna, Nawku Htingnu kata na San Pra ai gawk, Holy of Holies, ngu ai hpe gaw, sumsing mungdan hte bung ai ngu hkap la da nga ma ai. Nawku Htingnu a, kaga shara ni hpe gaw, mungkan ga hte hka panglai ni a gawng malai hku hkap la da ma ai. Wan shadaw shadun ai shadaw sanit hpe gaw, sumsing gang hkau e nga ai, mungkan hte bung ai, Jan Shata Shagan zawn re ni, a lachyum re ngu hkap la da ma ai. Nawku Htingnu kata e lang ai “muk” shi lahkawng hpe gaw, shata shi lahkawng ngu ai lachyum hku hkap la da ma ai. Lamu gang hkau e nga manga hte mungkan ga na nga manga yawng a lachyum rawng ai ndai Nawku Htingnu kaba, hten za mat na nga ai lam gaw, mungkan ga hten za na ngu ai lachyum re ngu hkam la nga ma ai.
Dai re majaw, Madu Yesu Jerusalem mare kaba na Nawku Htingnu ndai hten za mat na ra ai ngu, tau nau nna tsun yang, galoi hten na ngu shi hpe san nga ma ai. Madu gaw galoi hten za mat na ngu n tsun da nga ai. Raitim, Jerusalem kaw na Nawku Htingnu gaw AD 70, Madu Yeus shinggyim masha ni a majaw sat kau hkrum ai shaning 40 ning e, Titus ngu ai Roman hpyen du a hpyen ma ni jahten shaza kau ya ma ai.
Anhte ni a hkum hkrang mung, Israela masha ni grai tsaw ra, manu shadan lai wa ai Jereusalem Nawku Htingnu hte bung nga ai. Anhte ni a hkum hkrang hpe, mawn sumli nna, grai chye tsaw ra manu shadan chye nga ga ai. Anhte dum ra na gaw, Jerusalem na Nawku Htungnu, hten za mat ai zawn, anhte shingyim masha ni tsawra nga ai, anhte a hkrum hkrang htingnu mung, lani mi hten za mat wa na rai nga ai. Dai majaw, anhte a Wenyi hpe mung tsawm htap hkra tawn da ra nga ai. Mungkan htum ai zawn, anhte a hkum tsawp htum mat jang, n hten n za lu ai, anhte a wenyi Madu a Sumsing mungdan e shi hte rau ning ngai nga lu na matu, shakut hkawm sa ra nga ga ai.
Israela masha ni Jerusalem Nawku Htingnu hpe tsawm htap hkara gaw gap lai wa ai zawn, anhte a Wenyi ni hpe mung, anhte a kaja dik htum ai, nga sat nga sa, lai len ni, Madu jaw da ai, tara lam ni hpe shadik shatup let nga pra hkawm sa ra nga ga ai. Karai Kasang a tara ni hte Nawku Hpung a tara lam ni hpe hkan sa shadik shatup ai a marang e, anhte a wenyi ni mung san seng chyoi pra wa na rai nga ai. Anhte a wenyi ni mung, hkik hkam ai, san seng ai, Karai Kasang shanu ai, Htungnu ni tai nga u ga.
