“Hkum sai shan a shabrai kumhpa gaw si hkrung si htan rai nga ai; Wenyi a shabrai kumhpa gaw sak hkrung lam hte ngwi pyaw simsa lam rai nga ai.”
Roma 8:6
Tsawra ai Nu Wa Hpu Nau ni,
Anhte a kraw kata na myit mang ai lam ni gaw simsa ai sak prat hpe jaw ya lu ai zawn myit daw myit hten ai hte jam jau mung jaw ya lu nga ai. Kalang marang hpyen wa zawn anhte hpe hkalem kau chye ai mung, anhte a kraw na myit mang ai lam rai nga ai. Anhte a kraw kata na myit mang ai lam ni gaw anhte a hkam sha ai lam ni hte galaw sa ai lam hpe shabyin ya ai lam madung mung rai nga ai.
Tsawra ai hpu nau ni e, Karai Kasang gaw anhte a myit mang ai lam hpe uphkang madu mayu ai hpe dum nga ga. Anhte simsa ai sak prat lu na matu, anhte a kraw hta tsawm htap ai myit mang lam rawng wa hkra shabyin ya mayu nga ai.
Esaia laika 26:3 hta “Madu e, nang gaw ngang kang ai yaw shada lam shatup ai ni hte nang hpe kam hpa ai ni hpe hkum tsup ai ngwi pyaw simsa lam jaw ya nga ndai” nga nna tsun da nga ai.
Tsawra ai nu wa ni anhte gaw hpring zup ai simsa lam hpe nra mayu ai rai yang, anhte a myit mang ai lam ni gaw Madu Yesu a hpring zup kaja ai hta myit maju jung nga lu hkra shakut ra nga ga ai. Anhte a myit mang ai lam ni hpe Karai Kasang up hkang nga lu hkra shi hta kam sham ai myit hte hpang wa ga. Anhte a myit mang ai lam ni hpe myit ru tsam pu lam ni, hkrit kajawng masu magaw ai lam ni hte jahpring da ai rai yang anhte hpe galoi mung garum la ai Karai Kasang hpe nkam nsham ai hte bung nga ai. Karai Kasang hpe kaja wa kam sham ai rai yang, masha ni hte kanawn mazum ai lam ni grau nna kaja wa hkra
shakut ai htan shi hte matut mahkai ai lam hpe grau manu shadan na rai nga ai. Karai Kasang gaw anhte a prat a matu ra mara hpe jaw ya ai wa re ngu kaja wa kam sham ai rai yang, mung kan ga a arung arai ja gumhpraw ni hpe sha, hkan tam ai hte anhte a ten hpe shama kau na htan shi hta grau kam hpa na rai nga ai.
Anhte a shawng lam sak prat a matu kaja wa sha Karai Kasang hta kam hpa nga ai rai yang, anhte a makau hta byin nga ai lam ni hpe sha myit nna tsang nga na malai shi hta manoi nga na rai nga ai. Karai Kasang gaw anhte hpe tsawra nga ai, ra sharawng nga ai hpe kaja wa kam sham ai rai
yang, masha ni anhte hpe yu htang kaba hkra, grau tsawra wa hkra shakut ai hta aten shama na malai shi a tsawra myit hta kam shamyet nga na rai nga ai.
Roma laika 8:6 hta “Hkum sai shan a shabrai kumhpa gaw si hkrung si htan rai nga ai; Wenyi a shabrai kumhpa gaw sak hkrung lam hte ngwi pyaw simsa lam rai nga ai” nga nna shadum da nga ai. Tinang a myit mang ai lam hpe gara kaw maju jung na gaw tinang a daw dan ai lam rai nga ai. Anhte a myit mang ai lam ni gaw mungkan a lam, masu magaw ai lam, n kaja ai lam ni hta sha maju jung taw ai rai yang,
1 Petru 5:8 hta “nanhte a hpyen wa ngu ai satan gaw, kadai hpe
Kawa” mayu sha kau lu na i? nga nna shabam ai hkanghkyi ningwan hkawm nga ai” nga nna Kasa Petru shadum ai zawn sha, anhte a myit mang ai lam ni mung, anhte a hkam sha ai lam ni, anhte a hkum hkrang hpe jahten kau na ra ai.
Dai majaw nu wa hpu nau ni,
Anhte a myit mang ai lam hta kaja ai hte n-kaja ai lapran, Karai Kasang hpe kam sham ai lam hte mungkan lam hta ra sharawng ai lapran majan kasat ai zawn anhte shakut nga ra ai.
“Nanhte hta rawng nga ai Wenyi gaw mungkan ga hte seng ai ni hta rawng nga ai wenyi hta grau n-gun atsam kaba nga ai” nga nna Yawhan a shagun dat ai laika langai 4:4 hta n-gun jaw shadum da ai lam hpe
dum nga ga. Karai a kashu kasha ni rai sai majaw, Chyoi Pra ai Wenyi hta kabu awng sharawng ai sak prat de anhte hpe woi hkawm wa na matu Dai Chyoi pra ai Wenyi hpe lam woi ya na ahkang jaw nga ga. Kawa Karai Kasang hta anhte prat a matu hkum tsup ai masing nga ai hpe kam ga; shi gaw tsawra chye dik ai kawa kaja zawn anhte a makau e tut nga nga ai hpe kam ga. Anhte a sak prat hta tsam pu nga na malai, shi gaw mahkra hpe dang lu ai wa, anhte a ntsa e sadi dung ai wa rai nga ai majaw shi hta kam shamyet nna hkawm sa wa ga.
Anhte a prat shawng lam myit mada shara mahkra a matu shi hta kaja dik ai masing nga ai hpe kam hpa nna anhte a myit mang ai lam ni gaw shi hta mahta ai, shi woi awn ai myit mang ai lam tai wa lu hkra shakut nga ga. Chyoi Pra ai Wenyi gaw anhte hpe simsa kabu pyaw ai sak prat de lam woi ya na galoi mung jin jin rai nga ai.
Anhte hta shanu nga ai Karai Kasang a tsawra myit hta simsa ai myit mang ai lam lu la nna kabu pyaw ai nhtoi ni hpe hkam la lu mu ga akyu hpyi ya nga nngai.
