“Sumsing Lamu hte ginding aga lai mat wa ti mung, nye a ga gaw n lai mat na li ai.” ( Luk 21: 29 – 33 )
Tsawra ai shiga madat nu wa hpu nau ni, dai ni na lu ai Ja Chyum mungga hta, Karai Kasang a Mungga ni galoi mung agrin nga ai lam hpe na lu nga ga ai. Karai Kasang a ga ni grin nga ai hpe Chyum laika ni hta e, mu lu nga ga ai.
Ningpawt ninghpang laika hpe hti yu yang, Karai Kasang a, n-gup a ga ni hte sha, nga ma nga pra ma pra ni hpe, hpan lai wa ai lam na chye lu nga ga ai. Ningpawt ninghpang laika (1:3) “Shaloi Karai Kasang gaw, nhtoi tai wa u ga, ngu wu ai rai nna, nhtoi tai wa ai.” Karai Kasang hpan da ai ni ya ten du hkra grin nga ai hpe anhte ni ta tut hkam sha, mu la nga ga ai.
Madu Karai Kasang gaw, shi hpan da ai Sumsing Lamu hte ginding aga lai mat wa ti mung, shi a ga gaw n lai mat na nga tsun da nga ai. Madu Yesu tsun da ai ga ni law law kaw nna, Mahte a kabu gara shiga, 28:20 kaw ka da ai, “ngai nanhte hte rau dinggrin a nga nga na nngai law” ngu ai Madu a ga hpe hti nna n’gun awoi la ga.
Anhte ni a prat hta jam jau jam hkau, mayak mahkak, tsin yam tsin dam ni kahtap gala hkrum wa ai ten, hpa myit tim, nhkrang hkraw mat ai zawn nga hkam sha ai ten ni hkrum chye nga ga ai. Ndai zawn re mayat mahkak ni gaw, anhte hkum ngau shagu kaw, byin pru chye nga ai. Ya ten hta, Mungdan masa nkaja ai a majaw, myenmung e shanu nga ai masha law law, hpyen a majaw, myit ru myit tsang hkrum sha nga ga ai. Ndai zawn re mayak mahkak hkrum sha nga ai, anhte a prat hta Madu Karai Kasang gaw, “ngai nanhte hte rau dinggrin a nga nga ai” nga tsun nga ai.
Dai re ai majaw, anhte hkrum sha nga ai, jam jau jam hkau ni mahkra hpe, anhte hkrai n gun hpai ai sha Madu hte rau gun hpai nga ga. Anhte hkrai sha ru yak kyin dut ai lam ni hpe gun hpai nga yang, myit daw myit hten ai lam ni byin pru chye nga ai. Raitim, shi Madu hte rau gun hpai hkawm sa ai a marang e, anhte a lit ni grau tsang mat wa ai lam hkam sha lu na re. Kaning re mayak ni hpe mung, Madu Karai Kasang hpe tsawra ai myit ni, shi Madu ngai hte rau, rai nga ai ngu ai myit ni hte gun hpai jang, Madu a shaman chyeju ni a marang e tawt lai lu na rai nga ai.
Kasa Paulu gaw, Madu Yesu a mungga hte sak hkrung hkawm sa mat wa ai majaw, sasana majen je ai Kasa kaba byin lai wa ai. Kasa Paulu Hpilipi ni kaw shagun dat ai laika 4:13 “ngai hpe n-gun lagaw shaja ya ai wa a majaw, lam shagu hpe ngai hkam lu nngai” nga ka da nga ai. Kasa Paulu gaw, Madu Karai Kasang shi hte rau nga nga ai hpe, shi galoi mung hkap la kam sham ai majaw, ru yak kyindut ai lam, ma hkra hpe tawt lai lu kau da nga ai.
Anhte ni a prat hta mung, Madu Karai Kasang gaw, anhte hte rau dinggrin a nga nga ai hpe kam hpa nna, shi hte rau sak hkrung hkawm sa nga ga. Madu Karai Kasang anhte hte rau nga nga ai rai yang anhte n tawt lai lu ai lam n nga na re. Anhte shinggyim masha ni hpe tsawra dik ai majaw, anhte sak hkrung hkawm sa ai hkying ten shagu anhte hte rau dinggrin a nga nga ai nga tsun da nga ai. “Sumsing Lamu hte ginding aga lai mat wa ti mung, nye a ga gaw n lai mat na li ai.” Shi Madu a ga gaw, “ngai nanhte hte rau dinggrin a nga nga na nngai law.”
