General Audience hta, Wa Sarabyin Leo XIV gaw, Karai Kasang gaw mara raw ya ai, sharawt ya ai, kam hpa ai lam hpe bai gram lajang ya ai, hkala nba kaw nna, myit masin simsa lam hpe lu la na matu, hkum tsup ai kasi ningli langai rai nga ai Shi a Kasha hpe myit mada, kam sham na hpe shadum ya nga ai. Anhte a makam masham a madung hte myit mada shara gaw Hkristu a Hkrung rawt ai lam hta ngang ngang kang kang jung nga ai hpe bai myit dum shangun ai.

“Kaja wa nga yang, Yesu a hkrung rawt ai lam gaw, bawm jahkrat ai awng padang n re, shi a hpyen ni hpe matai htang ai (sh) matai htang ai lam mung n re,” nga ai “Yesu a Hkrung rawt ai lam gaw, tsawra myit gaw, n-hkap la lu ai hkrun lam hpe matut hkawm sa lu na matu, sum kaba hkrum ngut ai hpang, bai rawt jat wa lu ai atsam nga ai hpe mau hpa sakse hkam ya nga ai”

Anhte a myit masa hte Karai Kasang a myit masa gaw shai nga ai.

“Kaga masha ni a majaw hkra machyi hkrum ai hpang bai rawt wa ai shaloi, law malawng gaw shawng nnan bai htang ai lam gaw pawt sindawng ai, anhte hkrum sha lai wa sai tsin-yam ni a matu marai langai ngai hpe hka wa shangun mayu ai myit ni rai nga ai,” raitim, “Hkrung rawt wa ai Yesu gaw, si hkrung si htan a npu kaw na pru wa ai” rai nna, “matai n htang ai” nga nna Wa Sarabyin tsun ai. “Shi gaw n-gun atsam kumla ni hte matai n htang ai sha, sumnung shingdi ai myit hte hkala nba hta grau kaba ai, hkalem hkalau ai hta grau n-gun ja ai tsawra myit a kabu gara lam hpe madun dan nga ai.”

‘Ngwi pyaw nga myit ga.

Madu a shakram ga ‘Nanhte hta ngwi pyaw nga u ga!’ nga ai dai ga gaw asan sha rai ngai ai. Raitim, Yesu gaw sape ni hpe Shi a lata hte maga mi de, tsin-yam tsindam a masat kumla ni lawm ai hpe madun dan ai.

Madu gaw, Shi a hkala nba ni hpe madun dan ai hta, jahpoi asawng na matu n re ai sha, n kam sham ai lam hta grau n-gun ja ai tsawra myit hpe madi shadaw na matu daw jau ai, “anhte hkrat sum ai aten hta pyi, Karai Kasang n htingnut ai. Shi anhte hpe asum jaw ai sakse rai nga ai.” Nga nna Wa Sarabyin Leo asan sha tsun ai.

Matsan dum lama ai myit mada lam de galai shai wa ai.

Anhte hpe hkalem hkalau ai lam ni, hkra machyi shangun ai shaloi, “it doesn’t matter”, “dai yawng gaw lai wa sai aten hta rai sai” ngu tsun chye ai, raitim, “anhte gaw teng sha simsa lam n nga ai” ngu Wa Sarabyin Leo yin la ai. Madu gaw “Shi a hkala nba ni hpe mara raw ya ai lam hpe madi shadaw ya ai lam hku nna jaw ya ai” hte “Hkrung rawt ai lam gaw lai wa sai aten hpe yeng seng kau ai lam n re ai sha, matsan dum lama ai myit mada lam de galai shai wa ai lam re ai hpe madun dan ai.”

Karai Kasang gaw mara raw ya ai, sharawt la ai, kam hpa ai lam hpe bai gram lajang ya ai.

Madu gaw, simsa ai ga hte, Kasa ni hpe mungkan a matu htinglu htinglai ya ai lit hpe ap ya ai, shanhte hpe wenyi jahtoi ya ai hte, Kawa hpe madat mara ai hta, wudang ntsa du hkra tsawra ai hta Shi hpe madi shadaw ya ai Chyoi Pra ai Wenyi hpe jaw ya nga ai.

“Dai aten kaw nna, Kasa ni gaw, shanhte mu mada, na ai lam ni hpe, “Karai Kasang gaw mara raw ya ai, sharawt la ai, kam hpa ai lam hpe bai gram lajang ya ai” ngu ai lam ni hpe atsin sha nga lu na n rai sai, nga nna Wa Sarabyin tsun ai.

Anhte hpe mung shangun dat ai.

Ndai lam hpe myit dum let, Wa Sarabyin Leo gaw, “ Nawku hpung a sasana magam bungli a madung rai nga ai: kaga masha ni a ntsa e ahkang aya hpe uphkang na matu n re ai sha, tsawra hkrum ai ni a kabu gara lam hpe shanhte n ging dan ai aten hta hkrak sha tsun shaga na matu re” nga nna tsun da nga ai.

“Hkristan wuhpung wuhpawng ni hpe shabyin ya ai, rawt jat galu kaba wa shangun ai n-gun atsam re” nga nna tsun ai.