Wa Sarabyin Leo gaw, Madu gaw Lazaru hpe jahkrung sharawt la ai lam hpe tsun dan ai, “hkristu gaw si hkrung si htan hpe dang kau ai kumla hte, kashin kamun a marang e anhte lu la ai htani htana asak kumhpa hpe tsun dan ai kumla mung re.” Lazaru a kana Marhta hpe tsun ai zawn, Yesu gaw dai ni anhte hpe tsun ai, “Ngai gaw hkrung rawt ai hte asak rai nga nngai, ngai hpe kam sham ai ni gaw si mat tim, hkrung nga na mara ai, ngai hpe kam sham ai ni yawng gaw galoi mung n si na mara ai” nga nna tsun da nga ai.
Chyoipra ai bat magam a matu hkyen lajang ai lam
Daini na Kabu Gara Shiga gaw, Chyoi Pra ai Bat garai n du shi yang, Madu a tsin-yam tsindam hkrum ai mabyin ni hpe bai hkam sha lu ai aten rai nga ai — Yerusalem mare de shang wa ai lam, Hpang jahtum na Shana Shat Sha Poi, tara jeyang hkrum ai lam, wudang hta jen da hkrum ai lam, lup makoi ai lam ni hpe bai hkam sha lu ai. Ndai lam hku nna anhte hkum anhte hkyen lajang lu na hte de a ahkyak ai lam, lachyum hpe grau chye na la lu na matu chyoipra ai bat magam jaw ya ai chyeju kumhpa hpe hkam la lu na re.
“Ndai mabyin masa ni gaw, anhte a hkye hkrang la ai lam hte asak hpring tsup ai lam a matu, si hkrung si htan hpe dang kau nna, kashin kamun a jaw e anhte a kata e asak hkrung nga ai, hkrung rawt wa sai Hkristu hta hpring tsup nga ai.”
Mungkan hpe nhtoi jaw ai chyeju
Karai Kasang a chyeju gaw mungkan hpe htoi jahtoi ya ai, raitim anhte gaw manu dan ai lam ni hte kaga masha ni a matu anhte hta nga ai hkam sha lam ni hpe ten kadun shamat kau ya ai, “mying gumhkawng ai lam, arung arai ni, shangwi shapyaw ai lam ni hta anhte a ngun atsam, aten law law hpe jai jasum kau chye ga ai” nga nna Wa Sarabyin shadum ya nga ai.
Anhte yawng gaw anhte a kata kaw “n htum n wai ai hpe ra sharawng ai myit” hte, “lai wa sai lam ni hte myit shadik shatup lu ai lam n nga ai ra kadawn ai lam” hpe gun gag a ai. San Augustine ka da ai hte maren, “anhte gaw Karai Kasang a matu hpan da hkrum ga ai rai nna, shi hta nrai yang, simsa lam n mu lu ga ai.”
Nlung ni hpe shingdu de sit kau ga
Lazaru a hkrung rawt ai lam a labau gaw, dai aten hta, Chyoi Pra ai Wenyi a karum shingtau lam hte n-gun atsam hte, “anhte a myit masin hpe, lup n lung zawn, tinang hkum hpe sha myit ai, sut masa lam, n hkru n kaja ai lam ni a lup sung hku hta anhte hpe pat da ai kaw na lawt lu hkra” saw shaga nga ai hpe mu lu na matu Wa Sarabyin n-gun jaw nga ai.
“Yesu mung anhte hpe jahtau nga ai: “Pru wa marit!”, chyeju hpe pat shingdang da ai shara ni kaw nna pru wa nna, tsawra myit a nhtoi hta hkawm sa lu na matu, myit mada shara hte tsawra myit the hpring ai numsha, lasha nnan ni zawn, shi a n htum n wai ai tsawra myit a nhtoi hta, shadawn shadang n nga ai sha hkawm sa na matu shadut nga ai.” “ndai chyoi pra ai nhtoi ni hta shi a makam masham, kam hpa myit hte sadi dung ai lam ni hte sak hkrung lu na matu, shi a hkrung rawt sai Kasha hte hkrumzup lu ai hpung shingkang rawng ai mahkrum madup hte anhte hta shani shagu nnan bai jat wa lu na matu” Nu Maria a karum shingtau lam hpe hpyi la nga ga, nga nna tsun hpung dim dat ai.