Daini na Ja Chyum Mungga hpe hti sum ru yu ai shaloi e, Yesu shi si hkam na lam tau tsun ai hpe na lu ga ai. Ngai hpe shangun dat ai wa gaw dingman dinghpring ai wa re. Shi e tsun numhte ai mahkra hpe mungkan masha ni hpe ngai tsun ndau ya ai re nga Madu Yesu shi tsun da nga ai. Madu Yesu hte Kawa Karai Kasang gaw grai ni htep hku hkau ai re lam tsun dan nga ai. Dai hpe Yuda masha ni gaw n lu hkap la nga ma ai. Bai Yesu tsun ai Ngai sa na shara de nanhte lu sa na n rai ngu tsun ai ga hpe mung n chye madat nga ma ai. Ngai hpe shangun dat ai wa gaw ngai hte rau nga nga ai ngu ai.

Dai wa gaw ngai hpe kabai tawn da na n rai. Hpa majaw nga yang, Shi Madu ra sharawng ai lam hpe ngai hkan galaw sa ai majaw rai nga ai. Dai matsun da ai ga hte maren sha Madu Yesu hkan sa shatup nga ai. Dai zawn sha anhte Hkristan ni a prat hta e mung, Madu Karai ra sharawng ai lam ni hpe hkan sa shakut na matu anhte a lit kaba nan rai ga ai. Shingrai shiga madat nu wa hpu nau ni e, Karai Kasang ra sharawng ai lam hpe madung da hkan sa nga ai kun? Dai n rai yang madu ra sharawng ai lam hpe chyu sha hkan sa shakut nga ga ai kun? Tinang hkum tinang  san jep yu ga. Madu Karai a ra sharawng lam ni hpe hkan sa shatup yang, Madu Karai gaw anhte hte arau nga nga ai hpe anhte chye maram hkam sha wa lu na teng sha re.