Daini na Ja Chyum Mungga hpe hti sumru yu ai shaloi e, Yesu shangai wa na lam tau tsun da ai hpe na lu ga ai. MaduKarai Kasang gaw, hpan da ai shinggyim masha ni hpe grai manu shadan nga ai. Anhte shinggyim masha ni hpe Hkye la na matu shi a myit ra ai hku n rai,shinggyim masha ni a myit hkrum lam lu na matu Lamu kasa hpe Maria kaw sa dat ai. Hkyela Madu mung mahkawn hkawn jet a myit hkrum lam hte hkap hkalum la ai hkrum nu ai. Naw kaji nga ai shayi hkawn jet num sha gaw, Madu Karai a yaw shada lam hkap la ai a jaw e, Karai Kasang a Kanu byin tai wa sai re.

Asak prat kaji ai hkawn jet num sha rai nga ai Nu Maria gaw, Madu Karai a yaw shada ai lam hkap la ai majaw, shi a yaw shada da ai lam ni hpe dawm kau nna, shawng lam hta byin pru wa na mang hkang mayak lam ni hpe e, tau nau na n chye da ai rai nga ai. Raitim mung, Madu Karai Kasang a ra sharawng ai lam hpe awng sharawng myit hte ap nawng daw jau ya sai. Shingrai anhte a prat hta e mung, hkrum wa ai mang hkang mayak lam ni hpe, awng sharawng myit hte ap nawng daw jau lu hkra kyu hpyi nga ga law. Tinang a ra sharawng ai lam hta, Karai Kasang a ra sharawng lam a matu ap nawng daw jau ai a marang e, Karai Kasang kaw na lak lai ai shaman chyeju hkam la nga ga law.