Tara hkaw ngu ai shaloi tara hkaw na matu No 1 gaw n re ai, tara hkaw sara na malai tara sharin sara ngu yang grau hkrak ai lam nawku hpung sharin shaga ai. Nanhte anhte makam masham sharin la sai, tara mungga sharin la sai.
1. Tara hkaw sara ni gaw Karai Mungga hpe sharin ai, garan kachyan ya ai re.
2. Sakse hkam ai re. Tinang tsun ai hpe tinang nan galaw ai.
3. Tinang hkum nan shaman ai. Tinang hkaw tsun ai hpe tinang sakse hkam ai. Tinang sakse hkam ai hpe galoi mung shaman nga ra ai.
Nanhte sharin ai lam awng dang na matu nanhte gaw tinang a amu bungli hte sakse hkam ra ai. Hkaw tsun na ni, sharin na ni, sakse hkam na ni gaw galoi mung shaman nga ra ai.
Madu Yesu Hkristu a Mungga hpe anhte hkaw tsun ai, Madu Yesu Hkristu a Mungga hpe sakse hkam ai, Madu Yesu Hkristu a Mungga hpe anhte tatut shaman ai rai yang anhte gaw ninghtoi hta hkawm sa ai ni tai na ga ai.
Daini na zawn rai majan tsin yam byin nna masha ni law law grai myit kaji garen nga ai aten hta nanhte gaw ninghtoi tai nna, ningsin hta hkawm nna myit htum taw nga ai ni hpe lam woi ai, yawng e kam hpa lu ai sara saranum ni, kanu kawa ni tai nga ga.
De a marang nanhte mung lani hte lani myit ningun lu, hkum hkrang ninggun lu, wenyi ninggun lu nna nanhte a prat hta kup tsup ai, myit masin,wenyi hkum hkrang bawngring ai, nawku hpung myit mada ra sharawng taw nga ai Sara/num ni, shayi shadang sha tai mu ga.
