Daini na Ja Chyum Mungga hpe hti sumru yu ai shaloi e, Yesu a Lup Sin Langa ni hpe lagu matsun ai ga hpe na lu ga ai. Ya daini hti ai kabu gara shiga gaw, Paska ladaw a nam chyim hpe tsun da nga ai. Lup kata de sa ai num kasha ni gaw, kabu pyaw ai hte mau kajawng let lup sung hku na pru wa nna, kasa ni hpang de lagat sa mat ma ai. Shinggyim masha ni a mara hta Madu Karai Kasang a tsawra myit gaw grau na n gun kaba la nga ai. Si ai hte Madu Karai jaw ai asak gaw grau nna a tsam kaba nga ai hpe chye madat shangun ai. Pasak poi gaw, kabu pyaw hpa lam ni hte hpring zup nga ai poi kaba nan rai nga ai.

 Hkrung rawt ai Madu Karai Kasang gaw, Maria Madalena ni hpe Galile kaw kasa ni hpe hkrum na re ai lam sa tsun na matu htet dat nga ai. Dai zawn sha anhte ni hkrum katut ra na mai kaja ai hte n kaja ai lam ni hta, Madu shi tau nau du taw nga nna, anhte hpe shi manang tai ya nga na teng sha re. Paska a tengman lam ni hpe n kam ai majaw, ning dang nga ai chyum laika ka sara ni hte Hparishe ni nga ma ai. Yuda gaw gumhpraw ra marin nna, Madu hpe dut sha kau ai zawn, lup sung hku hpe sin ai ni mung dai gumhpraw a majaw, Madu Yesu hkrung rawt sai tengman lam hpe magap na matu shakut nga ma ai. Dai majaw Madu a mang lagu la hkrum sai nga n jaw ai hku shiga shabrawng ma ai. Mara hte si ai hpe awng dang lu ai Madu Karai a hpung dagu hpe hpaw tsun dan ai gaw, PASKA poi nan re nga nna San pra ai John Paul II tsun da nga ai. Paska poi ladaw hta anhte gaw, kam sham myit mada ai hte kabu pyaw nga ra ga ai law.