Daini na Ja Chyum Mungga hpe hti sum ru yu ai shaloi e, Sape lahkawng Emau mare de sa wa yang byin ai lam hpe na lu ga ai. Dai ni na kabu gara shiga gaw, ahkyak ai lak lai ai, chyum mngga rai nga ai. Hkristan prat ting hpe tsun dan ai nan re.Emau mare gaw, Jeruslem kaw nna deng (7) tsan ai shara re. Dai Emau mare de sa wa ai kasa lahkawng yan gaw lam lapran e Madu Yesu hte hkrum nna, rau hkawm sa wa ai mahkrum madup a majaw, shanhte sa mayu ai shara kaw nna, bai n htang wa nna, Jeruslem Mare de bai wa ma ai. Shingrai, Emau de sa ai hkrun lam na mabyin ni hpe kasa ni hpe bai sa tsun dan ai.
Madu Yesu gaw shan lahkawng hte a rau bu hkawm sa ai lam, chyum mungga a lam tsun dan ai. Bai hkring sa ai shara kaw Muk ga dan ai shaloi e Madu Yesu re ai lam chye mat nna, kajawng ai lam tsun dan nga ai. Shing rai ndai kasa yan gaw, kadai re mung n chye ai jasam hpe matsan dum ai hte, daw jau ai zawn, anhte mung kaji kadun yak hkak jam jau ai ni hpe, daw jau ra ga ai. Dai gaw Madu Yesu ra sharawng ai lam nan re. Ndai Emau hkrun lam a mahkrum madup hpe Missa hkungga hte shingdaw da nga ai re. Lam lapran hta Madu Yesu hte hkrum ai. Missa hta na galaw sa wa ai gin lam ni mahkra hpang jahtum e Chyoi pra hkum hpe hkam la ai lam ni yawng gaw, anhte a wenyi ninggun lu la nna, Madu Yesu galaw dan ai tsawra ai, simsa lam hte seng ai magam lam ni hpe anhte bai matut galaw lu hkra shakut sa ga law.
