Daini na Ja Chyum Mungga hpe hti sum ru yu ai shaloi e, Sape ni hpe Yesu shi hkum madun dan ai lam na chye lu ga ai. Chyum laika daw langai hta, Kasa Petru gaw lagaw n kaja nna hpyi sha ai wa hpe ngai gaw nang hpe jaw na ja gumhpraw mung n lu nngai. Raitim ngai nang hpe jaw lu ai gaw, Madu Yesu a mying Ningsang hta rawt hkawm u, ngu tsun ai hte lam lu hkawm mat ai. Madu Yesu a mying Ning Sang gaw, mau hpa hpung shing kang rawng nga ai. Kabu gara shiga hta e, hkrung rawt sai Madu Yesu hpe mu ai kasa ni myit ru ai hte n kam ma ai. Kasa ni n kam na zawn mau mahka ma ai, kabu pyaw ma ai.
Madu Yesu gaw kasa ni hpe ngwi pyaw nga mu ga, ngu tsun ai zawn dai ni anhte hte rau nga nga nna, sim sa lam jaw ya nga ai re. Madu Yesu hte langai sha rai lu na matu, Madu Yesu gaw, anhte hte arau sha nga nga ai. Hkrung rawt sai Madu Karai Kasang gaw, matsan dum chye ai wa re ai hpe madun dan nga ai. Dai majaw Madu Karai Kasang jaw ya ai simsa lam hpe anhte hkap la ai rai yang, simsa lam hpe jaw ya ai ni tai let, Shi a kasa ni hpe dat ai zawn anhte hpe mung dat dat na re. Shingrai Madu Karai a matsan dum ai lam hte tsawra lam hpe sak se hkam ai ni hku nna, anhte hpe dat dat na teng sha rai nga ai law. Ndai lit magam hta shang lawm gun hpai lu hkra ya ya jang shakut sa ga law.
