Htai Ya Ai Wa – Wa Jau Dr. Joseph Gawlu Yung Wa
GA SAN – Chyoi Pra ai Nu Maria gaw, n si ai sha jahkrung lamu de shalun la hkrum ai nga na naw kaji ten hta sharin dat ai. Manang lahkawng hpe san yu tim, maren sha htai ya ai. Nu Maria lamu de lung wa ai poi hta Wa Jau hkai dan ai hta: Nu Maria lamu de lung wa ai ngu gaw shi si mat ai nhtoi hpe myit dum a kyu hpyi ai lam she re, nga nna tsun dan ai.
Htai: “Chyoi Pra ai Maria gaw shi a hkum hkrang hte wenyi nawng sumsing lamu de shalun la hkrum ai” ngu ai gaw, chyum laika kaw nna dantawk (ga-si, ga-yan langai hpe sha la nna) sharin ai lam n rai nga ai.
- Ndai gaw Kahtawlik Hpung masha ni hkap la kam sham ra ai ngu nna Sarabyin Pio XII, 1950 ning hta ndau shabra dat sai.
- Rai tim, ndai makam masham gaw Madu a Shaning 500 daram kaw nna Hkristan ni kam sham hkap la was ai rai nga ai.
– Nawku Hpung hku nna ndai makam masham hpe hkap la ai a npawt nhpawng ni nga ai:
1) “Chyoi Pra ai Maria gaw Eva nnan re” ngu ai (theology) Karai hte seng ai sagawn hpaji a majaw: Nawku Hpung gaw Chyoi Pra ai Maria hpe “Eva Nnan” ngu nna mu mada ai. Shawng na Eva gaw shinggyim masha yawng a hkrat sum lam hta jawm lawm nang sai zawn, Maria gaw, shinggyim masha ni a “Hkye Mawai lam hkrum ai magam” hta shang garum nang sai. Shut mara a apu asi gaw “si ai hte hten yat” ai lam rai nga ai; rai tim, “chyeju ningsang hte hpring ai” Maria chyawm gaw lup kata e dai hten za yat mat ai hta na lawt lu nga ai.
2) Nawku Hpung gaw, Chyoi Pra ai Maria hpe “Ga-shaka Sumpu” hte shadawn da nga ai. Ga-shaka Dingsa prat na ga-shaka sumpu kata hta Karai a Mungga ngu ai “Tara Kanu Shi lung-pa” hpe bang da ma ai. Sawn la lu ai gaw – hpun hte sha galaw da ai ga-shaka sumpu hpe pyi (Tara Kanu Shi lungpa) a majaw, kaga san rai tawn, hkungga shagrau ai rai yang, Karai a Kasha Yesu Hkristu hpe shi a ‘Hkritung” e gun ai Hkawn-sek Maria a hkumhkrang hte wenyi gaw “Asak hkrung ai Ga-shaka sumpu” hte bung nga ai majaw, alak mi rai san da nna Karai Kasang a chyoi pra ai man de hkumhkrang hte wenyi nawng woi la na ging dan htap htuk nga ai.
3) “Sumsingl amu de shalun la hkrum ai” ngu ai gaw Hkristan ni hpe jaw da sai “ga-sadi” hpe shawng mu mada ai lam rai nga ai. Hkristu hpe kamsham ai ni yawng gaw hpang jahtum nhtoi hta “hkumhkrang” hta bai hkrung rawt wa na lam hpe sharin ya ai. Shinggyim masha hpe hkye hkrang la ai magma labau hta Hkawn-sek Maria a lak san shang lawm ai a majaw, shi a dinghta ga na asak aprat ngut ai hte rau, dai chyeju kumhpa hpe hkam la ai ngu nna sharin ya ai.
4) Shawng na tsa-ban laman na Yesu a kasa ni, mying dan hkung ai kaga san pra ai masha ni a n hten n yat ai hkum-tsawp/ nrut nra ni hpe anhte mu lu ga ai; raitim, Chyoi pra ai Maria a nrut nra ngu na hpe kadai mung n mu yu ga ai.
Tsa-ban 5 hte 6 daram hta – Sinpraw hte Sina Nawku Hpung yen hta “Chyoi Pra ai Maria a Yup Pyaw mat ai Poi” ngu nna shagrau galaw ai hpe yu yang, “Chyoi Pra ai Maria a hkum-tsawp gaw lup hta n rawng nga ai” ngu ai hpe dai aten na hpung masha ni kam sham ma ai hpe chye lu ga ai.
Shi a hkum-tsawp n hten n yat mat ai hta n-ga, hkum-hkrang hte Wenyi hpawn, Kasha Yesu e sumsing lamu de shalun la sai ngu nna hkap la kam ga ai.
San Ai Wa – Prang Hkudung Jau Gyinwang, SanYawhan Sara Ninghtawn, Hkai Bang mare hta shanu nga ai Jan Tareza Lasang Kaw Mai
