Daini na Ja Chyum Mungga hpe hti sum ru yu ai shaloi e, Nikodemu a lam na chye lu ga ai. Nikodemu shana e Madu Yesu kaw sa hkrum ai lam hpe sumru yu ra ga ai. Ndai Nikodemu ngu ai wa gaw, Chyum laika a shawng ningnan na chyum laika (5) hta tsun da ai ladat tara ni hpe tup hkrak hkan sa na matu ga sadi da ai Hparishe ni kaw na langai mi rai nga ai. Dai Hparishe ni hpe Karai Yesu wenyi hte bai shangai mu ngu tsun ai gaw, tinang a hkum hpe tsawra mu, ngu nna asan sha sharin shaga ai lam rai nga ai. Shingrai Kahtawlik hpung masha tai wa na matu, Kashin Kamun, Chyoipra Hkum hte Ninggun shaja chyeju ni hpe hkam la ra ai.

Ndai Sakramentu chyeju ni gaw, Madu Yesu a mung sung ai Hkum Hkrang hta hpring zup ai hku shang lawm lu na matu chyeju hpe lu la ai rai nga ai. Madu a Chyum mungga hku nna, Kashin Kamun hte Ninggun shaja Sakramentu ni a htani htana asak a matu ahkyak ai lam re hpe madi madun da ya nga ai. Ndai Kashin Kamun Chyeju kumla gaw, mara yawng hpe kashin shatsai kau ya nna, Ninggun shaja Sakramentu gaw ruyak jam jau ni a lapran e, makam masham hpe gwi gwi sakse hkam lu ai ni byim na matu n gun jaw ya nga ai. Anhte a shani shagu hta e mung, Chyoi pra ai wenyi lam a mdun ya ai hku hkawm sa lu hkra ja ja akyu hpyi ga. Anhte ni akyu hpyi ai ten shagu hta e, anhte ni bai ningnan shangai wa lu ai aten rai nga ai. Dai majaw akyu shaja let, chyeju hte hkumzup ai prat hpe lu madu hkra shakut sa ga law.