Wa Sarabyin Leo a Africa dan kasa hkrun lam mali ya laman hta, Algeria the Cameroon Mungdan ni de sa da nna, mungdan a ningbaw ningla ni, Muslim makam masham ningbaw ni, Jau, Mama Wuhpung ni, jahkrai ma ni, matsan masha ni the makam masham hpung shagu na hpung masha ni the hkrum shaga ai lam ni galaw lai wa ai.
Cameroon Mungdan Bamenda mare hta galaw ai Missa hkungga hta, Wa Sarabyin Leo XIV gaw, Cameroon mungdan masha ni, grau nna, zingri zingrat lam hte Anglophone manghkang ni a majaw hkra machyi hkrum nga ai ni hpe myit hkrum kahkyin gumdin ai lam tsun shapraw lai wa ai. Matut manoi yak hkak ai lam ni nga tim, simsa lam, htinglu htinglai lam, shinggyim sari sadang hpe hkungga ai lam ni hpe matut shakut sa wa na matu n-gun jaw ai.
Wa Sarabyin gaw, ndai ginra a tsin-yam tsindam ni hpe hkap la ai hta, matsan mayan, n tara ai lam, hkamja lam hte hpaji masa n-gun kya ai lam ni, ramma ni htawt sit ai lam ni lawm ai. Africa a sutgan ni hpe shinggan kaw nna akyu lu na matu jai lang ai lam a majaw buga ginra hta yak hkak ai lam ni grau sawng wa ai.
N Dai aten hta, mung shawa ni a ngang kang ai hte kabu gara ai makam masham hpe shakawn shagrau let, Karai Kasang hpe myit mada kam hpa ai kumla re ngu tsun shaleng dan ai. Kahkyin gumdin lam hpe bai gawgap na matu hte simsa ai shinggyim wuhpawng hpe gawgap na matu kalang ta galaw sa wa na matu tsun shadut ai, galai shai lam hpe “hpawt ni n re ai sha, dai ni kaw nna hpang ra ai” ngu ahkyak shatai tsun ai.
Shi a mungga madung gaw, Karai Kasang a mungga hpe kam hpa na matu shaga la ai lam rai nga ai, dai gaw n-gun nnan hte nden marai a npawt nhpang rai nga ai. Kasa ni a ga hpe lakap nna, Hkristan ni gaw “shinggyim masha ni hta grau nna Karai Kasang hpe madat mara ra ai” ngu nna ahkyak shatai tsun shalawm da ai, hpa majaw nga yang, dai gaw tengman ai lawt lu lam de woi sa wa nna, n hkru n kaja ai lam ni hpe ninghkap lu na matu hte grau kaja ai htawm hpang prat hpe gawgap lu na matu n-gun jaw ya lu ai.
Mung masa (sh) sut masa lam a matu makam masham hpe n tara ai hku n mai galaw ai ngu sadi jaw let, Karai Kasang chyu sha teng man ai lawt lu lam hte galai shai lam hpe jaw ya lu ai ngu ai hpe madi shadaw tsun lai wa ai. Bai, simsa lam, shinggyim sari sadang the seng nna mung tsun shadum lai wa ai lam hpe mung chye lu ai.
