20 APRIL, BAT LANGAI YA
Yawhan 6:2-29
Daini na Ja Chyum Mungga hpe hti sum ru yu ai shaloi e, Sumsing lamu na yu wa ai Muk re ai lam na lu ga ai. Madu Yesu jaw sha ai Muk hte Nga hkru hkra lu sha ai shawa masha ni gaw, Madu Yesu hpe tam let, Kahpanau du hkra tam ma ai. Dai masha u nawng ni gaw, Madu Yesu madun dan ai namik kumla a majaw n rai, Muk lu sha ai majaw rai nga ai. Dai shanhte grai ra sharawng n na tam ai Muk gaw, a hkyak ai lam n rai nga ai. Madu Yesu jaw ya na Muk gaw, n htum n wai A sak muk hpe madu lu na rai nga ai.
N dai A sak muk a ningpawt gaw, Madu Yesu shi Kashin Kamun hkam la ai shaloi, Kawa Karai Kasang dazik shakap da ya ai re. Shingrai Madu Yesu gaw shi Hkum shi Kawa Karai Kasang a Malai re ngu tsun dan ai rai nga ai. Madu Yesu hpe gadai wa re ngu ai hpe hkap la ai sha n rai, tinang a prat hta e, Madu Yesu a mungga hte shi madun dan ai jet ai, Teng man ai. N dai hkrang hte maren ap nawng daw jau nga ai lam gaw, makam masham lam a lai kyang nan rai nga ai. Dai zawn re ai jet ai Muk rai nga ai Madu Karai hpe tam mu na rai nga ai. Mungga hpe hti sumru ai hte Choipra Hkum Skamentu gaw Wenyi a lu sha rai nga ai. Bai Akyu hpyi ai gaw, Anhte a makam masham a matu lu sha majing nan re. Dai majaw anhte mung dai lu sha hpe tut e n gun jahpring nga sa ga law.
