21. Yesu gaw shi a sasana magam bungli hpe galaw hpang ai shaloi, Nazaret mare na tara jawng hta myihtoi wa Esaia a laika hpe hti let, myihtoi wa a ga hpe shi hkum shi jai lang let dan pru wa ai: “Matsan mayan ni hpe kabu gara shiga hkaw tsun na matu, Madu a Wenyi ngai hpe namman chya ya ni ai” (Lk 4:1f.1). Shingrai, dai aten hta, Karai Kasang a tsawra myit hte ni htep ai lam hpe shabyin ya na matu du sa nna, shi hkum nan hpe hpaw shadan dan nga ai, dai gaw yawng hta grau nna n hkru n kaja ai lam a bawng masha ni a matu, gawng kya ai ni hte matsan mayan ni a matu lawt lu ai magam bungli rai nga ai. Yesu a hkaw tsun ai lam hte rau nga ai kumla ni gaw, shanhte a masa a majaw, shinggyim wuhpawng hte makam masham nga ai masha ni pyi, shingdu tawn da hkrum ai machyi masha ni, matsan mayan ni hte mara kap ai ni hpe Karai Kasang tsawra myit hte matsan dum lama ai lam hpe madun dan ai lam rai nga ai. Myi kyaw ai ni a myi hpe hpaw ya ai, manggang kap ai ni hpe shamai ya ai, si mat ai ni hpe bai jahkrung ya ai hte matsan mayan ni hpe kabu gara shiga hkaw tsun ai: Karai Kasang gaw makau kaw nga ai, Karai Kasang gaw nang hpe tsaw ra nga ai (cf. Lk 7:22). shi hpa majaw ndai hku ndau shabra ai lam hpe sang lang dan nga ai: “Matsan mayan ni e, nanhte a lu myit dai: Karai Kasang a mungdan gaw nanhte a mungdan rai nga myit dai” (Lk 6:20). Karai Kasang gaw matsan mayan ni hpe grau ra sharawng ai lam madun dan ai: Madu a myit mada shara hte lawt lu lam a ga ni hpe shawng nnan shanhte hpe tsun ai. Dai majaw, matsan ai, gawng kya ai aten hta pyi, kadai mung kabai kau hkrum ai ngu n hkam sha ging ai. Bai nna, Nawku hpung gaw, Hkristu a Nawku Hpung tai mayu ai rai yang, kaji kadun ai ni hpe shara jaw nna, matsan mayan ni hte rau matsan mayan rai hkawm sa ai, matsan mayan ni hpe ahkaw ahkang lu jaw ai shara, Kabu Gara Shiga ni a Nawku Hpung rai ra ai (cf. Yak 2:2-4).
22. Dai aten hta, ra kadawn ai ni hte machyi makaw hkrum ai ni gaw, prat hta madung ra kadawn ai lam ni n lu ai majaw, hpyi sha ra ai hpe ayan mu hkrup ma ai. Shingrai shanhte gaw, machyi makaw hte matsan mayan lam gaw, tinang a yubak mara hte gara hku mi rai rai matut mahkai nga ai ngu kam ai majaw, shinggyim wuhpawng hta kaya kahpa hkrum ai lit hpe grau nna gun hpai nga ma ai. Yesu gaw ndai myit masa hpe ngang ngang ninghkap nna, Karai Kasang gaw “n kaja ai ni hte kaja ai ni a ntsa e shi a jan pru shangun nna, dinghpring ai ni hte n dinghpring ai ni a ntsa e marang jahtu ya nga ai” (Mt 5:45) ngu nna ngang ngang kang kang tsun shadut ya ai. Kaja wa nga yang, dai myit masa hpe shi tsep kawp yeng seng kau ya ai, sut su ai wa hte Lazaru a ga shadawn a jahtum daw hta anhte mu lu ai: “Ma e, nang naw hkrung nga ai aten hta, kaja ai arai ni hpe hkam la lu ndai, Lazaru gaw matan mayan hpe hkam sha lai sai hpe, dum nga u: ya chyawm gaw ndai yang e shi shalan shabran hkrum nna, nang gaw tsin-yam tsindam hkrum nga ndai” (Lk 16:25).
23. Dai majaw, Hkristu hpe kam sham ai lam gaw, “matsan mayan byin wa ai, matsan mayan ni hte n-gun n rawng ai ni hte galoi mung ni htep ai, shinggyim wuhpawng kata na yu lanu lahku n-hkrum ai masha ni a hkum tsup ai rawt jat galu kaba lam a matu anhte myit tsang ai lam a npawt nhpang rai nga ai” ngu ai hpe asan sha mu lu ai. Ngai ayan myit yu ai gaw, Chyoi Pra ai Chyum Laika a sharin achyin ai lam gaw matsan mayan ni a lam hpe asan sha tsun da ai raitim, hpa majaw masha law law gaw matsan mayan ni hpe n gawn n sawn di kau ma ai kun? Raitim, ya aten hta, matsan masha ni hte anhte a kanawn mazum lam hte Karai Kasang a amyu masha ni hta shanhte a ahkyak ai shara hte seng nna Chyum Laika hta tsun da ai lam ni hpe myit sumru ai lam hpe matut galaw sa wa ga.