HTAI YA AI WA – Wa Jau Dr. Joseph Gawlu Yung Wa
GA SAN -anhte Kahtawlik Hpung de na shaman ntsin hpe kaga hpu nau ni hpyi ai shaloi mai jo na kun? nmai jo na kun? Jaw dat yang mara lu na kun?
Htai: Kahtawlik Hpung, Orthodox, Anglican Nawku hpung ni hta – shaman da sai hka (shaman ntsin) hpe “shanhte a makam masham hte chyeju hkam la ai kumla (sacramental) hku nna lang ma ai.
Anhte hpe shadum ya ai lam n inga nga ai:
- Baptisma ngu ai (Kashin Kamun Chyeju kumla) hpe shadum ya ai. Kashin Kamun hkam ai shaloi, tinang Karai kasang hpe jaw da sai ga-sadi ni hpe bad um shangun ai; shaman ntsin hpe layung the madit la nna wudang masat galaw ai let nawku jawng kata de shang wa ai shaloi – chyoi pra san seng ai Karai Kasang a man de shang wa ga ai, ngu ai hpe shadum ya ai.
- Myit malai lu nna, myit masin wenyi hta jasan jaseng ai hpe hkam la ai ngu ai kumla re.
- Anhte a dum nta nga shar ani hpe Karai kasang kaw ap tawn da nna, Shi a makawp maga ai hpe hpyi ga ai. Makam masham masat dingsat – rosari, wudang, dali dazik, zawn re ai ni hpe akyu hpyi shaman ya ai hta lang ai.
- N hkru n kaja ai wenyi nat ni hpe dang kau na, shaden kau na matu akyu hpyi ai hta lang ai.
Dai majaw, ndai lam ni hpe hkap la kamsham ai rai yang gaw, jaw lang mai nga ai.
San Ai Wa – Laiza Jau Ginwang, Jeyang lawk (6) kaw shanu nga ai Benedet Nhkum Doi San
