Laika masat 24-26
Chyum Laika hta matsan mayan ni hpe matsan dum ai lam
24. Kasa Yawhan ka da ai gaw, “Tinang mu lu ai hpu nau wa hpe n tsaw ra ai wa gaw, tinang n mu lu ai Karai Kasang hpe n tsaw ra lu ai” (1 Yhn 4:20). Dai hte maren, laika ka sara wa a ga san hpe htai ai shaloi, Yesu gaw moi na tara lahkawng hpe lakap nna tsun ai: “Na a Karai Kasang Madu hpe na a myit masin mahkra hte, na a wenyi mahkra hte, na a n-gun atsam mahkra hte nang tsaw ra lu na ndai” (Tara Jahprang 6:5), hte “Na a htingbu wa hpe na a hkum hte maren tsaw ra lu na ndai” (Lev 19:18). Kabu Gara Shiga hkaw tsun ai wa Marku gaw Yesu a mahtai hpe ndai hku tsun dan ai: “Shawng na gaw, ‘Israela e, madat mara u: anhte a Madu Karai Kasang gaw, Madu langai sha rai nga ai: nang gaw na a Karai Kasang Madu hpe na a myit masin mahkra hte, na a wenyi mahkra hte, na a myit mang mahkra hte, na a n-gun lagaw mahkra hte tsaw ra lu na ndai.’ Lahkawng ngu na gaw, ‘Na a htingbu wa hpe nang hkum nan hta grau nna tsawra lu na n rai’” nga ai. (12:29-31).
25. Jaw Jau Laika hta gaw, htingbu wa hpe tsawra na matu sharin ya ai, kaga laika ni hta gaw, hpyen wa hpe pyi hkungga lara ai lam hpe tsun da ai: “Na a hpyen wa a dumsu shing nrai lawze lam dam mat ai hpe nang mu hkrup yang, dai hpe bai woi wa na rai ndai. lawt lu ai rai yang, lawt lu na matu nang karum la ra ai” (Pru 23:4-5). Ndai shara hta kaga masha ni hpe hkungga ai lam hta manu dan ai lam hpe asan sha tsun da ai: ra kadawn nga ai kadai mung, hpyen wa pyi, anhte a karum shingtau lam hte galoi mung ging dan nga ai.
26. Karai Kasang hpe tsawra ai lam a ahkyak dik ai lam hte seng nna Yesu a sharin achyin ai lam gaw, matsan mayan ni hpe tsawra myit n jaw ai sha Karai Kasang hpe tsawra lu na n re ngu ai shi a ngang ngang kang kang tsun ai lam hte asan sha madi shadaw ya nga ai. Anhte a htingbu wa hpe tsawra ai myit gaw, Karai Kasang hpe tsawra ai lam tengman ai hpe hkam sha lu ai sakse rai nga ai, Kasa Yawhan sakse hkam ai hte maren: “Karai Kasang hpe kadai mung n mu yu ai: anhte shada da tsaw ra nga ga yang gaw, Karai Kasang gaw anhte hta rawng nga ai rai nna, Shi a tsaw ra ai myit gaw anhte hta hkum tsup nga ai… Karai Kasang gaw tsaw ra ai myit rai nga ai rai nna, tsaw ra ai myit hta nga nga ai ni gaw, Karai Kasang hta nga nga ma ai rai nna, Karai Kasang mung shanhte hta nga nga ai Yh 2:1 .” Tsawra myit lahkawng gaw n bung tim garan n mai ai. Karai Kasang hpe asan sha n tsun ai mabyin masa ni hta pyi, htingbu wa hpe tsawra ai lam shagu gaw, lam langai ngai hku nna Karai Kasang a tsawra myit hpe madun dan ai lam re ai hpe Madu shi nan sharin ya nga ai: “Ngai nanhte hpe teng teng tsun made ga, ndai nye a hpunau ni hta na kaji dik htum ai wa hpe nanhte galaw myit yang, ngai hpe mung galaw myit dai” (Mt 2:4).