Daini na Ja Chyum Mungga hpe hti sumru yu ai shaloi e, Sabyi ru ga shadawn hpe na lu ga ai. Ngai gaw sabyi ru rai nga nngai. Nye Wa gaw, sun madu rai nga ai. Ndai ga gaw sabyi hpun a mabyin hte anhte Karai Kasang kaw tawn da ra ai kam hpa lam, matut manoi taw nga ai hpe madun dan ya nga ai. Sabyi ru gaw Sabyi hpun hkrung nga na matu, madung rai nga nna, lakung lakying ni gaw hpun matut mahkai ai lam n nga yang, asi si lu na n rai nga ai. Dai zawn sha Karai Kasang hte tsang gang nga ai masha ni gaw, hpa hpe mung lu galaw na n rai nga ai.

Shi Madu hte ni htep ai hku nga nna, Karai Kasang a lam madun ai hpe hkap la yang sha anhte a prat gaw, lachyum nga nna, akyu rawng ai prat hta sak hkrung hkawm sa lu na teng sha rai nga ai. Dai hta sha n ga, Kawa Karai Kasang gaw, sun madu rai nga ai nga ai hte maren, Sabyi si kaja si lu na matu, n kaja ai, n ra ai hpun lakying ni hpe kran daw kau ra ai. Dai zawn sha Madu Karai hte arau nga na matu, Karai a ga hpe madat na matu gaw, tinang a byin mayu ai lam ni hpe tawn kau ra ai a ten ni mung nga nga chye ai. Kalang lang e daw jau ap nawng ra ai. Bai nna mara raw hkyam sa ya ra ai. N kaja ai lam hpe mai kaja ai hku bai galaw ya ra ai lam ni nga wa ai ten ni hta e, grai machyi hkam ra nga ga ai. Raitim mung Madu Yesu hte arau nga nga ai rai yang, anhte hte Karai a lapran hta nga ai matut mahkai lam ngang kang nga ai rai yang, anhte a prat hta, asi hpring tup ai Sabyi hpun zawn hkrung nga na rai nga ai.