Daini na akyu hpyi sumru ai lamang hta,
Myit Mada Lam hta Asak Hkrung Ai (Life in Hope ) ngu jawm sumru yu ga.
Anhte a myit mada ai lam gaw Karai Kasang a Mungdn hta htani htana asak hte hkrung nga lu na lam rai nga ai.
Mungkan ga gaw, “Madu Yesu a chyeju ningsang hte htani htana nga lu na ga ai” ngu ai myit mada lam hte sak hkrung hkawm sa ga ai sha n rai yang, “hkrit hpa” hte “ myit n dik hpa” shara she rai nga ai.
Shawng nnan, Kasa Pawlu a shaman ai mungga hpe shawng madat la ga, Roma (15:13) hta na, “Ya, Chyoi Pra ai Wenyi a n-gun atsam hte myit mada ai lam hta nanhte gumring gumrat rai wa myit ga, myit mada npawt rai nga ai Karai Kasang gaw, kam sham ai lam hta e, chyeju the ngwi pyaw ai amyu myu nanhte hpe jahpring shatsup ya myit ga law” ngu ai rai nga ai.
Kasa Pawlu shakram, shaman ya ai hte maren anhte hta hpring wa u ga. Shinggyim masha a prat hta “myit mada ai” ngu ai nga ai. Dai myit mada ai lam hta mung “asak” ngu ai nga ai. Myit mada ai lam nga ai majaw mung, masha gaw “kabu gara ai” nga ai. Myit mada lam a majaw mung “yaw shada lam” ngu ai nga nga ai.
Dai majaw, “myit mada ai lam” gaw – masha a dawdan ai lam ni, myit hta hkam sha ai lam ni, hkan galaw sa wa ai lam ni yawng a npawt nhpang rai nga ai. Myit mada ai lam gaw anhte hkrum ang ai agung alau, ru yak lam ni hta pyi,kabu gara lam jaw ya nna, hkrat sum kataw wa ai aten ni hta sadi dung shakut shaja lu na atsam jaw ya ai.
Wa Karai Kasang gaw, anhte hpe myit mada lam hte hpring ai kasha ni tai na hpe ra nga ai. Roma (15:13) hta, “Ya, Chyoi Pra ai Wenyi a n-gun atsam hte myit mada ai lam hta nanhte gumring gumrat rai wa myit ga, myit mada npawt rai nga ai Karai Kasang gaw, kam sham ai lam hta e, chyeju hte ngwi pyaw ai amyu my, nanhte hpe jahpring shatsup ya myit ga law” nga nna Kasa Pawlu n-gun jaw da nga ai.
Ya, asim sha ng anna sumru akyu hpyi ga.
- Myit mada ai arawn alai ahkyak ai lam hpe sumru yu ga.
Yeremia (29:11) hpe madat yu ga,
“Karai Kasang ning nga ai: Nanhte a lam ngai myit ai hku, ngai chye nga nngai; nanhte hpe jahten na n rai; nanhte myit mada ai lam, htawm hpang e lu la hkra, ngwi pyaw ai hku hkrai ngai myit nga nngai.”
- Ndai Mungkan a lam ni hta nang myit myit maju jung ai shara/lam nga ai kun? Na a myit ra ai hpe shadik la na matu Mungkan lam lama ma hta tam nga ai kun?
- Na myit masin wenyi hpe sumsing mungdan a arai ni hta sha maju jung ng alu hkra garum y ana matu Karai Wak aw hpyi u.
Yawhan (10:10) hta na Madu Yesu jaw ai ga-sadi hpe bai myit dum ga,
“Ngai gaw, sagu ni asak hkrung lu na hte nhpaw n-ya lu la mu ga, ngu nna, sa ring ngai.”
Dai majaw, Roma (5:2-5) gaw anhte a makam masham nawku mahkawn tai nga u ga,
“Yesu a gawp e mung, ya lu la sagaw ai chyeju hta e, anhte kam sham ai the shang lu saga ai rai nna, Karai Kasang a hpung shingkang hpe myit mada nga let, kabu gumrawng nga ga ai.
Dai hta n-ga, tsin-yam tsindam hta e mung anhte kabu gumrawng ga ai; tsin-yam tsindam mahtang gaw shakut sharing ai, shakut sharing ai gaw myit marai ai, myit marai ai gaw myit mada ai shabyin nga ai hpe, anhte chye ga ai: dai myit mada ai chyawm gaw, kaya kahpa hkrum mi ai n rai: kaning rai nme law anhte hpe jaw da sai Chyoi Pra ai Wenyi e Karai Kasang a tsawra myit, anhte a kraw lawang hta e ru bang ya mani ai.”
Chyoi Pra ai Wenyi Karai Kasang gaw shiga madat nga ai ni yawng hpe “myit mada ai” Hkristan arawn alai hpe shangang shaking ya u ga law.