RVA MASAT NINGHTOI hpe May 10, 2026 ya shani Manmaw Saradaw Ginwang, Je Yang IDPs (hpyen yen camp) hta galaw lai wa sai. Ndai RVA masat ninghtoi hta Manmaw Saradaw Ginwang a Sagu Rem Wa, Wa Saradaw Raymond Sumlut Gam hte Wa Jau ni, Mama ni, Tara Hkaw Sara/ Num ni hte shiga madat hpung masha ni yawng 400 jan shang lawm lai wa sai rai nga ai.
RVA MASAT NINGHTOI hpe galaw ai lam hta Daw-2 hku nna, galaw lai wa sai. Shawng daw hta gaw Missa Hkungga hpe jahpawt 8:00 AM hta Wa Saradaw hku na woi awn let RVA Nsen shapoi dap hte shiga madat ni a matu Nawngjau ya lai wa sai. Daw 2 hta gaw RVA Jinghpaw Nsen shapoi dap magam gun ni, Wa Saradaw hte du sa ai RVA shiga madat ni rau hkrum shaga ai lamang hpe galaw lai wa sai.
Ndai hkrum shaga ai lamang hta RVA Jinghpaw Nsen Shapoi Dap a Lithkam Wa Jau Thomas Salaw Brang Awng kaw nna RVA Jinghpaw Nsen Shapoi a labau gadun, Yaw shada ai lam, Myit mada ai lam RVA Jinghpaw Nsen Shapoi Dap kaw nna galaw nga lamang lam ni hte seng nna, tsun sang lang dan ai hte shiga madat ni kaw nna mung matut hpaji jaw garum la na matu saw shaga ai lam, RVA shiga madat ni hku nna, RVA hpe madat la ai majaw hkam la lu ai akyu chyeju ni hpe sak se hkam ai lam, RVA hte seng ai ga san, ga htai galaw ai lam hpe Wa Saradaw hte RVA Lithkam Wa Jau hku nna tsun htai ya lai wa sai. Lamang hta sa du shang lawm ai shiga madat ni hpe Gam chyam kumhpa jaw ai lamang hpe mung galaw lai wa sai.
RVA MASAT NINGHTOI lamang hta Wa Saradaw hku nna, ‘’RVA a No.1 pandung gaw Madu a Tengman ai Mungga hpe hkaw tsun na matu re”, matut nna, “Kabu gara shiga ngu ai gaw shinggyim masha langai a lawt lam, hkye la ai lam re. Karai Kasang a Mungga hte a sak hkrung ai wa ngu gaw, manang wa hpe jam jau n jaw ai” nga nna, n-gun jaw Mungga hpe hkaw tsun lai wa sai rai nga ai.
RVA MASAT NINGHTOI hpe lai wa sai a ten ni hta gaw shaning shagu galaw ai raitim COVIDE ana zinli aten ladaw hte mung masa shimlum lam nnga ai majaw n lu galaw lai wa sai. Dai ning 2026 hta she bai lu galaw ai rai nga ai.
