RVA lamang amyu myu nga ai hta na Madu a mungga hpe hkaw tsun ai, kabu gara shiga hkaw tsun ai gaw No 1 madung re. Madu a kabu gara shiga ngu ai gaw shinggyim masha langai a lawt lam, hkye hkrang lam hpe tsun ai. Shinggyim masha langai gaw hkum hkrang, wenyi, myit masin masum hpe pawng nna Karai Kasang hpan da ai.
Daini RVA gaw madu a tengman mungga hpe hkaw tsun ai shiga dap re. Mt 10: 27 hta “ngai nanhte hpe nsin kata e tsun dan ai lam hpe nhtoi hta e nanhte tsun dan mu. Nanhte na la ai hpe nta ntsa kaw na ndau ka up dan mu”. Ndai hpe RVA galaw taw nga ai magam bungli re.
RVA de laika ka bang shamg lawm nna Madu a tengman ai mungga hpe nta ntsa kaw na ndau ai hta shang lawm ai ni re. Arawng la ga, yawng shang lawm ga. Roma 10 hta San Pawlu tsun ai hkaw tsun dan ai wa n nga yang gaw kaning rai na la lu na a ta? Garai nna yu ai wa hpe kaning rai na kam sham lu na rai ta?
Madu Yesu Hkristu a lam n hkaw dan yang Madu Yesu hpe kadai n chye wa ai. Anhte hkaw dan yang she shi hpe kam sham ai ni law wa nna Madu a mungga hte asak hkrung ai mai kaja ai masha ni law wa na magam hpe RVA galaw taw nga ai hta anhte shang lawm ga.
Karai Kasang a mungga hte asak hkrung ai masha ngu gaw manang wa hpe jam jau n jaw ai. N kam hkum rai mu.
Mungga hte asak n hkrung jang manang wa hpe jam jau jaw chye ai, mungga hte tsan jang amyu myu byin ai, mai kaja ai mungkan de hkawm lu na yak ai. Ndai mai kaja ai mungga hpe hkaw tsun na RVA a No 1 madung pandung re.
Dai kaw na hkai lu hkai sha ai du hkra lawm ai dai ni yawng gaw kabu gara ai hte seng ai madu a mungga hte matut mahkai ai lamang re. RVA shapoi ai hkai lu, hkai sha lam gaw Karai Kasang jaw ai shingra nam hpun, hpun law hpun lap hpe jai lang nna hkai sha ga, dai gaw shim lum ai, kaja ai malu masha re, gat kaw mari sha na malai tinang hkai sha ga ngu ai hkai lu hkai sha lam hpe she RVA shana ya ai re. Hkum tsup ai, hkrung grin ai bawng ring lam gaw hkum hkrang, wenyi, myit masin yawng lawm ai.
Hkum hkrang kaw si hpang gara n mai ai, hkam kaja n ‘gun rawng nga ra ai. Kade hkam kaja tsawm htap taw tim myit n pyaw jang kade mu ai malu masha mung n kam sha ai, yup mung n kam yup ai, n hkam kaja wa ai, dai majaw myit masin a hkam kaja lam, hkum hkrang a hkam kaja lam nga ra ai.
Daini na aten shiga shapoi dap ni grai nga ai, uhpung uhpawng ni grai law ai raitim law malawng gaw shanyam ai shiga ni she grau law ai. Hpaga lam, lu lawm lam hku nna galaw ai shiga ni gaw n teng n man ai, shanyam ai she grau law ai. RVA gaw tengman mungga hpe hkaw tsun shapoi taw ai shiga dap re.
