Ndai mabyin hta, si na yupku ntsa e nga ai dingla langai mi gaw, Yesu hpe Shi a mungdan de woi shang wa na matu shaga nga ai lam hpe tsun dan ai re. Shi a jinghku jingyu ni gaw, shi gaw shingran katsi nga sai ngu nna, shada da tsun shaga nga ma ai. Dai hpang, akajawng sha si wa na masha wa gaw nsa sa nna shanhte hpe tsun ai: Yesu gaw ya ndai kaw nga nga ai hte Shi gaw nye a lata hpe jum da ai hpang si wa na masha wa gaw shi a myi man hta kabu gara let nsa sa wa ai.

Yesu a mying gaw grai atsam rawng ai anhte hpe simsa lam jaw ya lu ai n hkru n kaja ai myit mang lam ni hte wenyi ni hpe shaden kau ya lu ai. Raitim, Yesu a mying hpe anhte ayan shaga ga ai kun? Lama na rai na re (sh) n rai na re (sh) Yesu hpe grai ra kadawn nga ai aten hta sha shi hpe shaga na hpe dum ai rai na re. Raitim anhte a yak hkak ai lam ni hpe lai di ngut ai hpang Shi hpe kalang bai malap kau ga ai. Ga shadawn, teng sha law law gaw ya aten hta Covid-19 a majaw akyu hpyi shakut nga ai raitim ndai Covid-19 ana zinli ngut ai hpang? Anhte law malawng gaw moi na zawn Madu kaw sung sung akyu hpyi na kun?

Yesu a mying gaw grai atsam rawng ai hpe galoi mung shaga la na hpe galoi mung n malap ga. Shani shagu na prat a hkam sha lam ni hta myit daw myit hten ai shaloi, n-gun ja ai Yesu a mying hpe shaga la ga. Ndai majan a majaw myit mada lam n nga mat wa ai aten hta, n-gun ja ai Yesu a mying ningsang hpe shaga la ga. Machyi makaw hkrum ai aten hte kaga lam ni hta Yesu a atsam rawng ai mying ningsang hpe shaga la ga.

Kaja ai aten hta mung, n kaja ai aten hta mung Yesu hpe shaga na matu galoi mung dum nga ga. Anhte a akyu hpyi ga ni hpe Kawa hpang de sa ya na matu Shi kaw hpyi nem ga, Shi gaw anhte hpe galoi mung n jahten kau na re.