Yawhan gaw Yesu tsawra ai sape rai nga ai; shan lahkawng a lapran ni htep ai  hku hkau lam nga ai rai nna, Yawhan Shi a lahpa ntsa e shingbyi nga ai hpe anhte mu lu ga ai (Yawhan 13:23-25). Yawhan mung Yesu hpang jahtum nsa sa ai aten du hkra Yesu hte rau nga ai sape langai sha rai nga ai.

Anhte ya aten hta kaga masha langai a lahpyen ntsa e dung nga ai hpe mu ai gaw grai mau hpa rai na re. Anhte a myit sawn sumru ai lam ni gaw n tara ai kaga lam langai ngai hpe dawdan kau na re. Raitim Yesu a aten hta; dai gaw Sara/madu (Yesu) hte Shi a sape (Yawhan) lapran hku hkau lam hpe tsun mayu ai. Shanhte a hku hkau lam a n-gun atsam gaw, Madu a mungkan ga ntsa prat htum ai aten du hkra, Yawhan Yesu hte rau nga ai shaloi asan sha mu lu ai.

Ndai gaw Madu anhte kaw na ra sharawng ai jinghku hku ai lam mung rai nga ai, Yesu mung anhte hpe galoi mung Shi hpang de shinggrup nna, anhte a prat hta yak hkak ai lam ni hpe n sawn ai sha, Shi hte rau nga na matu ra sharawng nga ai. Anhte a kabu gara ai aten ni hta Yesu hte ni htep nga ai zawn, yawn hkyen ai aten, yak hkak ai aten ni, chyam dinglik ai lam ni hta Yesu hte grau ni htep ai hku nga nga ai.