Daini na Ja Chyum Mungga hpe hti sum ru yu ai shaloi e, Lusu ai shabrang wa hte sumsing mungdan a lam, mungkan sutgan hpe Karai hpe zawn myit jung nga ai gaw, hkrit hpa kaba rai nga ai lam ni hpe na chye lu ga ai. Daini anhte nawku hpung a Kanu rai nga ai sanseng sanpra ai hkawnsek Maria a poi hpe galaw nga ga ai. Madu Yesu a Udang nhpang kaw nga ai hpawmi (4) hta e Nu Maria mung lawm nga ai. Madu Yesu gaw Nu Maria hpe Kasa Yawhan kaw ap ya ai zawn, Nu Maria mung Yawhan hpe kasha majing zawn hkap la nga ai. Nu Maria gaw shi kasha a hkye hkrang la ai magam hta ten tup shang lawm ap nawng ai jan re.

 Maria shi a ga manoi byin wa u ga ngu ai ga si hpe jahtum du hkra hkan sa shatup sa nga ai. Udang lam hta kasha hte arau sha garum shingtau ai zawn, Kasa ni a ntsa e chyoi pra ai wenyi yu hkrat wa ai shaloi shi mung lawm nga ai re. Nu Maria gaw makam masham lam hte madat mara ai lam ni hta myit mada ai hte atsam rawng ai jan mung rai nga ai. Bai Nu Maria gaw tsawra matsan dum ai lam hte sadi dung ai lam ni hta e, anhte ni yawng kasi la mai ai jan nan rai nga ai. Shingrai anhte a prat hta e mung, Udang hpai let Madu Yesu a hpang hkan na matu Nu Maria zawn jin jin rai nga sai kun? Shani shagu e udang hpai let, Karai Kasang a myit ra sharawng ai lam ni hta shagrit shanem ai hte hkap la lu na matu shakut sa ga law.