Daini na Ja Chyum Mungga hpe hti sumru yu ai shaloi e, Yesu shi n`ni n`kri hkrum na lam masum ngu na lang tsun ai lam hpe na la lu ga ai. Madu Yesu gawYeruslem de Kasa ni hte a rau lung wa ai shaloi, shi n ni nkri hkrum ra na lam, sat kau hkrum na lam, masum ya ninghtoi hta bai hkrung rawt wa na lam ni hpe tsun dan ai shaloi e, Yaku hte shi kanau yan gaw, Madu Yesu hpung shingkang dang hkung ai shaloi e, lapai maga de langai mi, lahkra maga de langai mi nga lu na ahkang hpe jaw na matu hpyi nem ma ai. Kaja wa teng sha nga yang,  dai Kasa yan shan lahkawng gaw, Madu Yesu tsun mayu ai lam ni hpe n chye madat ai rai nga ai.

Shan lahkawng gaw mungkan ga na arawng aya, reng power a hpang de hkan nang mat lam rai nga ai. Dai zawn Madu Yesu a kasa ni pyi arawng aya, reng power a mahkam de du mat wa ai hpe mu lu nga ai. Ya daini na prat hta e, mungdan hpe up hkang nga ai ningbaw ningla ni, reng kaba ai shara kaw nga nga ai n kau mi gaw, reng power hte jahkrit shama ai. Bai tinang tinggyeng lam a matu akyu tam ai. Madu a reng ngang grin na matu kaga masha ni hpe adip arip di dip sha taw nga ai rai nga ai. Raitim Madu Yesu tsun ai gaw, ningbaw ningla byin mayu ai wa gaw mayam shawng tai ra ai nga nna tsun da nga ai. Shi hkum nan mung shi hpe daw jau ai hpe hkam la na matu du sa ai n re. Masha hpe daw jau na matu she du sa ai re lam hpe asan sha tsun shadum ya sai re.