Daini na Ja Chyum Mungga hpe hti sum ru yu ai shaloi e, Mai hpang hpun hpe Yesu dagam kau ai lam hte Nawku htingnu hpe Yesu jasan jaseng kau ai lam hpe na la lu ga ai. Daini hti ai chyum laika hta Madu Yesu a lak lai ai magam lam ni hpe mu lu ga ai. Madu Yesu gaw asi n si ai mai hpang hpun hpe dagam kau ai. Kaja wa teng sha nga yang ndai mai hpang hpun gaw Isrela masha ni a matu wenyi lam yan hte matut mahkai nga ai. Shanhte ni a sadi n dung ai lam ni, Karai Kasang a ga n madat ai lam ni hte Madu Yesu hpe ninghkap kau ai mabyin ni hte seng nga ai. Ntsa lam wenyi lam yan jahpring ai hte sha gaw, mai kaja ai masha tai na ngu ai gaw n mai byin nga ai.

Bai daw lahkawng hku nna, Madu Yesu gaw nawku htingnu kata hta gat dut ai ni hpe gawt shapraw kau ai. Dai gaw grau nna, matsan mayan re ai ni kaw na, n tara ai hku mya lu mya sha re ai ni hpe, gawt shapraw kau ai lam rai nga ai. Hpang jahtum e Madu Yesu gaw, Kasa ni hpe kam sham ai myit nga na matu hte dai kam sham myit nga ai rai yang n mai byin na re ngu sawn da ai lam ni mahkra lu galaw hkrang shapraw la lu na re ai lam hpe tsun da nga ai. Mungkan hta e anhte ni galaw sa wa ai, kaja ai n kaja ai lam ni a akyu amyat ni gaw anhte teng sha hkam sha lu na rai nga ga ai. Shingrai shiga madat nu wa hpu nau ni yawng hte e, anhte a makam masham hpe rawt jat galu kaba ra ga ai. Asi law law si ai, akyu rawng ai, Madu Yesu a hpang hkan ai shangun ma ni tai nga na matu  shakut sa ra nga ga ai.