Daini na Ja Chyum Mungga hpe hti sum ru yu ai shaloi e, Sun shap galaw ai masha n kaja ai ni a ga shadawn lam ni na la lu ga. Daini gaw San pra ai Justine a poi ninghtoi mung rai nga ai. San pra ai Justine a poi ninghtoi shani hta ndai ga shadawn hte rau, shi a prat hpe anhte sumru yu ga. San pra ai Justine gaw shi zingri zingrat hkrum ai raitim Madu Yesu a tengman ai lam hpe gwi gwi tsun gam garan ai gaw makam masham hta ngang kang ai wa re. Anhte a prat hta, Madu Yesu a sharin shaga ai lam ni hpe tsun dan na matu, anhte a tsun shaga, galaw sa ai lam ni ra nga ga ai.

Shingrai Madu Karai Kasang nga nga ai hpe chye nga na matu, ndai chyum mungga daw hte sadi jaw da nga ai. San pra ai Justine gaw shi a makam masham lam hta ngang kang nga ai zawn, anhte ni mung Madu Karai Kasang kaw manoi nga nna, shi a tsawra myit hte tengman ai lam ni hpe kaga masha ni hpe garan gachyan lu na matu, anhte a tsun shaga galaw sa ai sat lawat ni mahkra gaw, kaja ai apu asi ni tu pru nga na matu, tsawra myit hte tengman jaw htuk tara lam hta manoi nga nna, anhte a sak hkrung prat kadun mi a matu sak hkrung na hta, anhte a prat htani htana a sak a matu hkan tam shakut sa nga na matu Madu Karai Kasang yawng hpe ja ja ninggun jawda nga ai law.