Daini na Ja Chyum Mungga hpe hti sumru yu ai shaloi e, Kesar hkawhkam hpe baw hkanse bang jaw ai lam na lu ga ai. Kesar hte seng ai hpe Kesar hpe jaw nna, Karai Kasang hte seng ai gaw, Karai Kasang hpe jaw u. Ndai chyum mungga hta, hkum hkrang hte wenyi, mungkan lam hte sumsing mungdan lam yan hpe maren jahtuk la chye na matu sharin ya nga ai. Dai gaw anhte a makam masham lam hpe shingdu tawn da ai hku n re ai sha, anhte a mungkan lit magam ni hpe mung, gara hku galaw hparan chye ra na lam ni hpe myit sawn sumru na ninggun jaw da nga ai.

Ndai zawn shut shanut nga ai mungkan hta e, Ngai ngu ai tinggyeng myit hta, Karai Kasang, Hkum sai shan ra marin ai lam hta, wenyi a ra gadawn lam, Lu su sahti ni hta, kaji kadun nga ai ni hpe madung da na, madu lu la na hta, kaga wa hpe jaw lu jaw sha na matu, Bai nna, mungkan a lit magam ni hta na, sumsing sut gan a lit magam ni hpe tengman jaw kaja ai, tara rap ra ai lam ni hpe, hkan tam mahkawng ai a marang e, anhte a magam lam ni mahkra gaw, Karai Kasang hte seng nga ai re lam hpe anhte yawng hpe tsun sadi jaw nga ai re. Dai ni ja chyum mungga hpe hti sumru dinglik yu nna, Karai Kasang hte seng ai hpe, Karai Kasang hte shi a magam lam ni hta ap jaw chye na ra ahkyak nga ai lam ni hpe hkan sa shakut nga ga law.