Manmaw Saradaw Ginwang a lit hkam Wa Saradaw Raymond Sumlut kaw nna RVA gaw Madu a tengman ai Mungga hpe hkaw tsun ai shiga dap re. Kabu gara shiga hkaw tsun ai shiga dap re. Mungkan ting chyam hkra hkawm sa nna, makam masham hpe, Karai Kasang a tsawra myit hpe hkaw tsun mu nga nna Madu Yesu shangun dat ai magam bungli hpe Kasa ni galaw lai wa sai. Dai aten hta Veritas mung n nga ai, Radio mung n nga shi ai. Kasa lagaw hku hkawm nna Sasana galaw lai wa ai.

Daini gaw anhte a buga, tinang a amyu sha ga hku shapoi ai Radio Veritas nsen shapoi dap nga taw sai. Daini na aten Radio shapoi ai shiga dap ni hkum sumhpa shapoi taw nga ma ai. N hkru n kaja ai lam mung shapoi ai, sat hkat, nat hkat ai lam ni grai shapoi nga ma ai. Raitim kabu gara shiga shapoi ai shiga dap gaw shau ai.

Shiga madat ni mung mungkan shiga ni hta gara kaw sat hkat ai, gara kaw marai kade hpe gap kau sai ngu ai shiga Ga Baw ni hpe sha grau yu law nga ai. Tsawra ai lam, Madu Yesu Hkristu, Karai Kasang, Chyoi Pra ai Wenyi a shatsam ai shada da mara raw ya ai lam, shada da tsawra hku hkau na,shada da bawng ban na, shada da ngwi pyaw lam gaw gap na shiga ni hpe gaw Ga Baw pru wa ai hte shalai kau chye nga ai. Nat na, Gap na, Sat na lam hpe grau madat mayu taw ai. Dai zawn rai yang anhte galoi mung n pyaw lu ai.

Chyoi Pra Ai Wenyi lu ai ni she galoi mung kabu pyaw lu ai. Anhte a kabu ai lam ni, jahkring mi, lana mi, lahkawng na, shata mi kabu nna hten mat ai gaw n grin ai. Hkrung grin nga ai kabu pyaw lam gaw Chyoi Pra Ai Wenyi Karai Kasang kaw na sha re ngu ai hpe kam ga. Dai hpe ndau taw nga ai, dai hpe sakse hkam taw nga ai gaw Radio Veritas re. Veritas kaw na Madu a kabu gara shiga lamang ni hpe shani shagu shapoi ya nga ai hta nanhte, anhte marai kade madat nna kaning re ai akyu hkam sha nga ga ai kun. Anhte Radio Veritas shaning law law hkaw tsun lai wa sai n’gun jaw la ga, akyu mung hpyi ya ga nga nna Bishop Raymond Sumlut Gam kaw nna RVA-Kachin Jinghpaw Service a RVA Day galaw ai shani shiga madat ni hpe tsun dat nga ai.