Daini na akyu hpyi sumru yu na ga baw hpe: “Abiding Throug obedience,

Karai Kasang a ga hpe  maadat mara let asak hkrung ai lam, ”  ngu nna la ga.

Madat mara ai ngu ai myit lachyum gaw, n kaja ai ngu ai lachyum hte ka-up da hkrum nga ai. Madat mara ai lam hpe myit ai shaloi anhte gaw ra sharawng ai lam (sh) ra sharawng ai nlawm nna bungli langai ngai hpe galaw ra ai,  ngu ai hku nna hkam la ga ai. Anhte gaw madat mara lam hpe lit hte matut mahkai nhtawm, shadik shatup ai lam langai hku nna nsawn la ga ai. Raitim Yesu mungkan ga ntsa hkawm sa ai shaloi shi gaw grai shai ai madat mara ai sak hkrung lam hpe gun hpai dan nga ai. Sumsing lamu na Kawa hpe madat mara ai lam gaw gara hku rai na hpe Yesu a prat kaw nna madun dan nga ai. Karai Kasang a ga madat mara ai ngu ai gaw, anhte hpe hkup tsup ai hku galoi mung tsawra ai,  anhte a Karai Kasang hpe tsaw ra myit hte ap nawng daw jau ai asak hkrung lam hpe lata la ai lam rai nga ai.

Yesu gaw Kasa Yawhan a laika, 15:9-10 hta, “Wa ngai hpe tsaw ra ai zawn, ngai mung nanhte hpe tsaw ra made ai: nye a tsaw ra ai hta nga nga mu, ngai gaw nye Wa a ga matsun hkan shatup nna shi a tsaw ra ai hta nga nga nngai zawn, nanhte mung nye a tsaw ra ai hta nga nga na marin dai” nga nna tsun da nga ai. Karai Kasang anhte hpe madat mara na matu shaga ai shaloi, shi a myit masin hpe anhte malap kau ga ai. Yesu gaw shi a Kawa madun dan ai tsawra myit hpe bai htang let shi a prat dai kawa a tsawra myit hta sak hkrung nga ai. Shi a prat hpe lit nga ai majaw n re ai sha, shi hta nga ai Kawa hte shi a hku hkau lam a sutgan kaw na Karai Kasang a ga madat mara ai hku sak hkrung wa ai. Bai nna, Yesu gaw anhte hpe mung dai zawn galaw na matu sha tsun ai. Shi zawn sumsing lamu na Kawa hte sung htum ai hku hkau lam hta nga lu na matu, anhte a prat a npawt nhpang hku nna,  tsawra myit hpe hkap la let jaw ya ai lam de anhte hpe saw shaga nga ai.

Luka  10:27,  Yesu gaw kaba dik htum ai tara ni hpe tsun da ai gaw, “Na a Karai Kasang Madu hpe na a myit masin mahkra hte, na a wenyi mahkra hte, na a n-gun lagaw mahkra hte, na a myit mang mahkra hte, na a htingbu wa hpe na a hkum hte maren tsaw ra lu na ndai” nga nna tsun da nga ai. Anhte a Karai Kasang a myit masin gaw, lit nga ai (sh) n ra sharawng ai hkungga jaw ai prat masa de n’shaga ai sha, Hkristu hta anhte hpe madun dan ai tsawra myit kaba hpe mungkan ting hpe bai htang jaw ai prat masa de shaga la ai gaw kade daram mau nma re nga ai law. Karai Kasang gaw na a man e tara ni hpe sha tawn da ai n’re ai sha, hku hkau lam hpe she yaw shada ai lam hku nna tawn da ai. Shi gaw na a myit masin hpe lakawn lanawn let  hkan tam nga ai.

Tinang hkum hpe tam ai, tinang hkum hpe myit dik shangun ai lam ni hta sha shinggrup da ai mungkan hta, Karai Kasang gaw anhte hpe anhte a lit kaw na pru wa lu na matu hte, kaga masha ni a matu tinang a asak hkrung lu na matu lawt lu shangun nga ai. Gumrawng gumtawng ai lam ni hte ka-up da ai mungkan hta, Karai Kasang gaw anhte a sumsing Kawa hta nga nga ai kashu kasha ni byin tai wa hkra galai shai ya lu ai atsam nga ai shi a n sim n sa, tinang hkum hpe n-gawn nsawn ai tsawra myit hpe ru jaw ya nga ai. Karai Kasang a hkang da ai ga ni hpe hkan sa na matu lata la nna, myit masin mahkra hte tsawra ai rai yang, tinang hkum hpe sha myit ai hte gumrawng gumtawng ai myit jasat nga ai ni e, n chye ai, myit dik lam hpe hkam sha lu na re. Karai Kasang hta jung nga ai ni sha lu la mai ai,  law htam ai asak hpe anhte hkam sha lu na re nga ai.

Dai majaw, dai ni Karai Kasang a hkang da ai ga ni hpe hkan sa nga u. Karai Kasang hte kaga masha ni hpe myit masin mahkra hte tsawra ai sak hkrung lam hpe lata la u. Karai Kasang a mau hpa tsawra myit hpe htang ai hku nna shi hpe madat mara ai hku asak hkrung na matu lata la u. Bai nna, Hkristu hta nang hpe madun dan ai tsawra myit hte kaga masha ni hpe daw jau ai kaw na lu la ai atsam, yaw shada lam, lawt lu lam hpe mu tam la  hkra shakut u.

Ya, asim sha akyu hpyi sumru yu ga:

1. Shi hpe mung, shada da mung tsawra na matu Karai Kasang a hkang da ai ga hpe myit sumru yu ga. Karai Kasang a mungga hpe myit sumru ai shaloi tsawra myit hte sak hkrung hkawm sa na matu, shaga la ai lam hpe hkap la u.

“Wa gaw ngai hpe tsaw ra ai zawn, ngai mung nanhte hpe tsaw ra made ai: nye a tsaw ra ai hta maju jung nga mu, ngai gaw nye Wa a ga matsun hkan nang nna shi a tsaw ra ai hta maju jung nga nngai zawn, nanhte mung nye a ga matsun hkan shatup myit yang gaw, nanhte mung nye a tsaw ra ai hta maju jung na marin dai.”

2. Sumsing Lamu na Kawa a tsawra myit hpe hkam la lu na matu aten jaw u. Karai Kasang gaw nang shi hpe (sh) kaga masha ni hpe bai tsawra na matu n ra sharawng shi yang, shi a tsawra myit hpe chye na ai lam hte nang hpe galoi mung jahpring ya mayu nga ai. Anhte a madat mara ai lam gaw shi a tsawra myit hpe galoi mung htang ai lam re. Dai majaw aten la nna, dai ni shi nang hpe tsawra ai tsawra myit hpe nnan hka jaw u.

“Shi anhte hpe shawng tsaw ra mi ai majaw, anhte tsaw ra nga ga ai.” 1 Yawhan 4:19 hpe hti u.

3. Dai ni tsawra myit hte sak hkrung hkawm sa lu na matu Chyoi Pra ai Wenyi hpe hpyi la u. Kaga masha ni hpe tsawra na matu shi nang hpe shaga na lam amyu myu hpe shi tsun dan na matu aten jaw u. Dai ni na aten hta na a ningrum ningtau hpe gara hku grau tsawra lu na kun? Na a kaja dik htum manang, bungli manang, htingbu ni hpe gara hku tsawra lu na kun? Dai ni nang hku nna Karai Kasang a tsawra myit hpe ru jaw na matu Chyoi Pra ai Wenyi hpe hpyi nem u. Bai nna, shalan shabran lam hte htunghking a lai leng ni hte nhtan shai ai wa ai aten hta pyi kaga masha ni hpe tsawra na matu shakut nga u.

“Tinang hkum hpe n hkalem kau ai sha, dai mungga hpe na la ai ni sha n rai, dai hpe hkan galaw ai ni tai nga mu.” Yaku 1:22 hta mu lu ai.

Dai ni sumsing Lamu na Kawa a tsawra myit hta grin nga lu u ga. Tsawra myit rawng ai sak hkrung lam hpe lata la lu u ga. Bai nna, Karai Kasang a hpung shingkang sumsing lamu hta zawn, ga ntsa de mung du sa wa ai hpe mu lu na matu, anhte a prat hpe hkawm sa wa ai shaloi, anhte a akyu hpyi ga gaw, Shakawn Kungdawn 119:32-35 hta lawm ai Shakawn Kungdawn Sara zawn rai u ga:

Nang nye a myit masin hpe galu kaba shangun ai shaloi, na a hkang da ai lam hta ngai gat na nngai! Madu e, na a matsun maroi lam ngai hpe sharin ya e; dai hpe mung jahtum du hkra hkan shatup na nngai. Na a tara hpe nye a myit masin mahkra hte hkan shatup lu hkra, ngai hpe chye chyang ai nyan jaw ya  e. Na a hkang da ai lam hta ngai hpe woi wa e, dai lam hta ngai sharawng awng nga nngai.

Shiga madat nga ai ni yawng hpe Chyoi Pra ai Wenyi, Shi a simsa ai chyeju jaw ya nna tut e bau sin nga u ga law!