Daini na Ja Chyum Mungga hpe hti sum ru yu ai shaloi e, Bum ntsa e Yesu hkaw tsun ai wunli lu ai lam ni shing n rai “A” lu ai tara lam ni hpe na la lu ga ai. Hkristu Yesu gaw, myit shagrit shanem ai ni, tsawra matsan dum myit rawng ai ni, myit masin hpraw tsawm ai ni a matu, mai kaja ai shaman chyeju ni hpe garan jaw ya nga ai. Bai nna, zingri zingrat hkrum ai ni, myit kaji garen hkrum nga ai ni, tara rap ra lam hpang gara taw nga ai ni, masha ni yu kaji hkrum ai ni, masha ni e shingdu tawn da hkrum ai ni gaw, Karai Kasang kaw na shalan shabran ya ai hpe hkum zup hkra hkam la lu ai majaw ndai zawn sharin ya ai lam rai nga ai.

Jet ai pyaw hpa lam gaw, tsawra matsan dum lama ai tara lam hte asak hkrung lam kaw na sha lu la mai nga ai. Dai majaw ndai A lu ai tara lam (8) gaw anhte yawng hpe ja ja shadum ya nga sai. Anhte a Hkristan prat hta ndai A Lu ai tara (8) hpe hkan lang hkan sa manat da nna, Karai Kasang hpe lu Madu da nga na grai ahkyak nga ga ai re. Shingrai anhte ni prat hta e, mayak lam hkum sum hpa kaw na, Karai Kasang hpe lu madu da ai. Shi madu a chyeju ni hte hpring zup taw nga ai rai yang, anhte gaw lam shagu hpe tawt lai lu na teng sha re. Dai majaw anhte a makau grup yin ni hta e, tsawra myit hpe grau lu madun dan nna, kaji kadun ai ni, manaw manang n lu ai ni hpe ninggun jaw, manang tai ya let ndai mungkan hpe shatsawm ya lu hkra, shi Madu kaw chyeju hpyi let, hkawm sa nga ga law.