Wa Sarabyin Leo XIV a Mungkan Mungdan ni de sa du kawan ai ( 4 ) lang ngu na Kasa hkrun lam hpe Spain Mungdan de sa du kawan ai  Kasa hkrun lam hku nna ( 6. 6. 2026 ) ya shani Roma kaw nna rawt hkawm sa wa sai rai nga ai.

Spain Mungdan Madrid Muklum kaba hta Spain Hkawhkam hte rau Mungdan a seng ang ai asu ya ningbaw ningla ni hte hkrum shaga lam galaw ai.

June 7 ya, Yesu a Chyoi Pra ai Hkum hte Sai Poi laban shani Spain Mungdan Madrid Muklum Kaba hta nga ai masha wan 1.2 jan sa du shanglawm ai Yesu a Hkum hte Sai Poi Missa Hkungga hpe Wa Sarabyin Leo Nawng Jau ya ai.

 Missa Hkungga hta  Wa Sarabyin Leo XIV gaw, Eucharist a galai shai wa lu ai atsam hpe myit sumru let, Spain mungdan masha ni hpe labau a daw langai mi sha n rai, makam masham a hkrung nga ai npawt nhpang langai hku nna, anhte a nawku htung lailen ni hpe naw hkrung nga hkra galaw na matu n-gun jaw lai wa sai.

Chyoi pra hkum gaw Shi a amyu masha ni a lapran Hkristu a hkrung nga ai lam re ngu ai hpe Wa Sarabyin ahkyak shatai tsun shalawm da nga ai. Shi a Hkum hte Sai kumhpa hku nna, Yesu gaw kam sham ai ni hpe Karai Kasang a asak hte tsawra myit hte bau maka ya nna, Kawa hte kanawn mazum na matu saw shaga nga ai.

Spain mungdan hta galaw ai Corpus Christi htunghking, grau nna chyoi pra hkum hpai kawan hkawm let hkungga shagrau ai hpe Wa Sarabyin Leo gaw, ndai poi ni gaw htunghking arawn alai (sh) sumla hkrung ni hpe madun dan ai hta grau ai, nga nna tsun ai. Shanhte gaw, Shi a amyu masha ni hte rau matut hkawm sa nna, shalan shabran lam, myit mada shara, simsa lam ni hpe jaw ya nga ai, hkrung rawt sai Hkristu hpe kam sham ai lam hpe shawa man hta tsun dan ai lam rai nga ai.

Shi sang lang dan ai hta, Eucharistic hkawm sa ai lam gaw, Hkristan ni hpe Yesu gaw anhte hpe bau maka ya ai sha n-ga, shani shagu na sak hkrung lam hta mung, grau nna matsan mayan, tsin-yam tsindam hkrum nga ai, langai hkrai sha nga ai, shingdu tawn da hkrum ai ni hte rau nga ai hpe shadum ya nga ai. Ndai poi gaw kam sham ai ni hpe tinang hkum hpe sha myit ai, myit n lawm ai, langai hkrai a makam masham hta lai nna, Hkristu a nga nga ai lam hpe shanhte hpe galai shai shangun nna, grau tara rap ra ai hte matsan dum chye ai mungkan hpe gawgap na matu shadut ya na matu shaga la nga ai.

Spain mungdan a shawng lam hpe tsun shaga ai shaloi, Wa Sarabyin gaw, amyu sha ni a makam masham htunghking gaw, tsawra myit, daw jau ai lam, yawng a akyu ara a matu ap nawng ai lam ni hpe sharin ya ai “makam masham jawng” langai hku nna naw nga nga na matu tsun shadut ya nga ai. Hkristan ni gaw, shinggyim wuhpawng a mayak mahkak ni hta atsam rawng ai hku shang lawm na matu hte kaga masha ni a akyu ara a matu galaw na matu shaga la hkrum ai ni re, nga nna tsun ai.

Wa Sarabyin Leo gaw, “chyoi pra hkum hka hpawk” kaw nna n’gun nnan lu la nna, kaga masha ni hpe tsawra myit, simsa lam, tara rap ra lam, kabu gara lam ni hpe jaw ya lu na matu, yawng hpe n’gun jaw da nga ai. Shi gaw chyoi pra a chyeju gaw kam sham ai ni hpe galai shai ya nna labau hta myit mada shara ningnan bai jat ya ai. Hkristu zawn byin tai wa na matu shaga nga ai.

Ndai poi hpe Wa Sarabyin woi awn ai Madrid muklum hta chyoi pra hkum hpai kawan shinggrup hkawm  ai lam hte shangut ai rai nna, Chyoi Pra ai Sakramentu hpe hkungga jaw ai hku nna, namsi namsaw ni hte mawn sumli da ai lam ni hpe galaw lai wa  ai.

Wa Sarabyin Leo XIV a  Spain Mungdan de sa du kawan ai Kasa hkrun lum gaw  June 6 – 12 ya shani du hkra rai nga ai majaw Wa Sarabyin a hkrun lam ngwi pyaw awng dang lu na matu akyu hpyi ya nga ga.