Daini na Ja Chyum Mungga hpe hti sum ru yu ai shaloi e, Kabu gara shiga hpe myit grit nem ai ni hkap la ma ai lam hte Sumnung shingdi ai Hkristu a lam ni na la lu ga ai. Madu Yesu gaw hkri ba lit li ai ni yawng hpe ban sa la na matu hte, shi Madu kaw sa na matu saw shaga nga ai. Jaw ai hku ban sa la ai ngu ai gaw, Shi Madu kaw sharin la chye yang sha mai byin nga ai lam hpe tsun hpaw dan nga ai. Hpa majaw nga yang shi gaw, sumnung shingdi ai wa re ai. Bai nna myit shagrit shanem ai wa mung rai nga ai.

Ndai chyum mungga daw gaw, anhte shinggyim masha ni a shakut shaja hkawm sa shamu shamawt ai a lapran hta, Madu a shalan ya ai hte, ninggun atsam bai lu la mai ai lam anhte hpe lit la garum ya nga ai. Anhte shani shagu hkrum ra nga ai mayak shoihpa lam ni mahkra hpe garum ya na, lam madun ya na matu Madu gaw tut nawng e, ala nga ai hpe dum chye ra ga ai. Dai hte maren shi Madu a tsawra myit hta gahkyin gumding let, kaga masha ni hte ndai tsawra matsan dum lama ai myit masin hpe gam garan nga sa ra ga ai. Shaloi jang anhte a makau grup yin ni hta, ngwi pyaw simsa lam, tsawra matsan dum lama  chye ai lam hpe gaw gap sa lu na rai ga ai. Anhte a mayak lapran kata  Madu Yesu kaw kam shamet nga sa ga law.