Wa Sarabyin Leo XIV gaw, bat masum Ya shani na General audience hta, shi a Spain mung dan Kasa Hkrun Lam, Madrid, Barcelona, Montserrat, Canary zunlawng ni de sa du gawan lai wa ai lam hpe myit sumru yu lai wa ai.
Makam masham hpung masha ni kaw nna n-gun jaw ai: Spain mungdan masha ni, kam sham ai hpung masha ni, tsawra myit hte kabu gara hkap tau hkalum la ai lam ni a majaw grai shalan shabran ai the n-gun lu ai lam tsun ai.
Kahkyin gumdin lam hpe saw shaga ai lam: Nawku hpung gaw shinggyim nga pra masa hte htunghking n bung ai raitim, shada da kanawn mazum ai lam, bawngban ai lam, kahkyin gumdin ai lam ni hpe galaw sa wa na matu ahkyak shatai tsun dan ai. Shi tsun ai hta, tengman ai kahkyin gumdin lam hpe Hkristu hta sha gawgap lu ai, myit masa (ideology) (sh) laksan myit lawm ai lam ni hta n-re.
Spain Mungdan a Kahtawlik Sali wunli, hkring htawng: Spain Mungdan a sut su ai Kahtawlik htunghking hpe Wa Sarabyin shakawn shagrau let Uropa mungdan a Hkristan sali wunli hpe makawp maga nna dai ni na aten na mayak mahkak ni hta jai lang akyu jashawn ra ai hkrung ai sutgan langai hku nna tsun shaleng da nga ai.
Prat dep mungkan masa: Shi gaw simsa lam, makau grup yin hpe lit la ai lam, ngang grin rawt jat galu kaba lam, shinggyim sari sadang, artificial intelligence a majaw byin pru wa ai arawn alai hte seng ai mayak mahkak ni zawn re ai lam ni hpe madi madun dan ai.
Margin kaw nga ai masha ni hte hkrum shaga ai lam: Shi hpe grau nna myit shang sha shangun ai gaw, ma kaji ni, matsan mayan ni, roi rip hkrum ai ni, bawng masha ni, myit tsang nga ai ramma ni, htawt sit bu hkawm ai ni hte hkrum zup ai lam ni rai nga ai.
Htaw sit bu hkawm masha ni hte hpunau nauna tsawra myit: Africa kaw nna htawt sit shang wa ai ni a shara kaba rai nga ai Canary zunlawng ni hpe myit sumru let, amyu bawsang ni a lapran jawm galaw ai lam, bawngban hpawng galaw ai lam, htunghking galai shai ai lam, hpunau nauna myit rawng ai lam ni hpe tsun shadut da ai.
Myit mada lam hte tsawra myit: Yak hkak ai lam ni nga tim, bawngban jahkrup ai lam hte shada da chye na hkat ai lam gaw “tsawra myit a htunghking” de du wa lu ai lam tsun da nga ai.
Hpang jahtum mungga: Hkrun lam a ga baw hpe bai kahtap tsun let, “Na a myi man hpe sharawt shatsaw u!” ngu ai hpe bai kahtap tsun let, yawng hpe Madu hpang de myi hpaw nna, Kabu Gara Shiga hta myit mada shara tam la na matu n-gun jaw ai hte shi a mungga hpung dim dat ai.
Wa Sarabyin Leo XIV gaw ndai hkrun lam hpe hkrung nga ai makam masham a kumla rai nna, daini na mungkan hta kahkyin gumdin lam, myit mada shara, shinggyim sari sadang a npawt nhpang Hkristu naw rai nga ai hpe shadum ya ai lam re ngu tsun shadum n-gun jaw lai wa ai lam Vatican shiga dap kaw tsun shapoi da ai hpe mu chye lu nga ai.