Daini na Ja Chyum Mungga hpe hti sumru yu ai shaloi e, Yawhan Baptister shangai wa ai lam na lu ga ai. Daini na chyum mungga daw langai hta, Myi htoi Ezaea tsun ai ga hte  Yesu du sa na matu lam shawng hkyen lajang ya na lata la hkrum ai Kasa Yawhan zawn, kaga masha ni a matu Karai Kasang a shaga la ai lam hpe mung madi madun ya nna, anhte marai hkum shagu a matu mung, yaw shada da ai lam langai hpra hte Karai Kasang a yaw shada da ai npu kaw e, ninggam langai hpra hta shang lawm taw nga ai re hpe shadan shadawng tsun da nga ai.

Bai Chyum mungga daw (2) hta e, Yesu a matu lam shawng hkyen lajang ya na matu, Kasa Yawhan hpe gara hku shaga la ai lam hpe madi madun ya nna, Mesia a shawng lam hpe hkyen lajang ya ai wa ngu shi a lam hpe tsun madi madun ya ai. Ndai Yawhan Baptister shangai wa ai lam gaw, Karai Kasang a shaga la ai lam hpe hkan shatup ai a manu hpe san san madi madun ya nga sai. Kasa Yawhan gaw shi a Madu hpe ap nawng na matu, shi a asak prat hpe ap nawng ya sai. Shi gaw kaga masha ni hpe mung, Madu Yesu hpang de lam woi sa ya sai. Anhte yawng mung tinang a prat hta lu la sai chyeju ni hpe, hkap la nna, Madu Yesu a tsawra myit hpe shadan shadawng ya let, Karai Kasang tsun ai ga ni hpe madat hkan sa lu na shakut sa ga law.