June 28, laban shani na, Angelus mungga hta, Wa Sarabyin Leo XIV gaw, Mahte a Kabu Gara Shiga (10:37–42) hta Yesu a sharin achyin ai lam hpe myit sumru let, tengman ai Hkristan tsawra myit hta ‘hkap la ai, tinang hkum hpe ap nawng kau ai, manam daw ai lam’ ra ai ngu ai hpe ahkyak shatai tsun shalawm da nga ai.

Tsawra myit hta Hkristu hte hku hkau lam rawt jat galu kaba wa na matu hkam kaja lam n nga ai myit jasat ni hpe ‘dat kau ra ai’ lam ni lawm ai lam hpe Wa Sarabyin sang lang dan ai. Shi gaw dinghku hpe ga shadawn hku nna tsun ai, dai hta ningrum ningtau yan gaw kanu kawa ni hpe kau da nna, prat nnan hpe rau gawgap la ai, kanu kawa ni gaw ma ni hpe shanhte lagaw shanhte tsap lu hkra, tinang a bungli hpe tam lu hkra karum ya ai.

Shi gaw ‘tsawra myit hta galoi mung sum mat ai lam langai ngai lawm chye ai’ ngu ai hpe mung madi madun da ai. Teng man ai tsawra myit gaw, tinang hkum hpe jaw ya ai hku nna asi si wa ai, kaga masha ni hpe aten jaw ai, shalan shabran ai, tinang hkum hpe sak jaw ai. Yesu a hpang hkan nang ai ngu ai gaw, tinang hkum hpe nyet kau ai tsawra myit kaw na pru wa ai  hpring tsup ai asak hpe hkam la lu na matu, wudang hpe hkap la nna, tinang a asak hpe “sum kau, jaw kau” ai lachyum rai nga ai.

Hpang jahtum, Wa Sarabyin Leo gaw, ‘hkap la ai lam’ hpe tsawra myit hpe atsawm hkrak madun dan ai lam re ngu nna madi madun dan ai. Hpang gara nga ai wa hpe ntsin jaw ai zawn re ai asan sha galaw ai mai kaja ai lam ni gaw Hkristu a tsawra myit hpe madun nga ai. Yesu a mying ningsang hta kaga masha ni hpe hkap tau la ai hku nna, Hkristan ni gaw Hkristu shi hkum nan hte Kawa hpe hkap tau la ai rai nna, Karai Kasang hpe tsawra ai myit gaw, tinang a hpunau nauna ni hpe tsawra ai myit hte garan n mai ai lam hpe madun dan nga ai.